कांग्रेसको संसदीय दलको नेता चयनका लागि निर्वाचन कार्यक्रम तय

४ पुस, हेटौंडा । नेपाली कांग्रेसमा संसदीय दलको नेता चयन गर्न आगामी पुस ६ गते निर्वाचन हुने भएको छ । सोमबार काँग्रेस, संसदीय दलको नेता तथा कार्यसमिति निर्वाचन समितिले संसदीय दलको नेता चयनका लागि निर्वाचन कार्यक्रम सार्वजनिक गरेको हो ।
निर्वाचन कार्यक्रमअनुसार पुस ४ गते मतदाता नामावली प्रकाशन हुनेछ । त्यस्तै पुस ५ गते बिहान ८ बजेदेखि १० बजेसम्म उम्मेदवारी दिने कार्यक्रम रहेको छ । त्यस्तै पुस ५ गते बिहान १०ः३० बजे उम्मेदवारको प्रथम नामावली प्रकाशन गर्ने समितिले जनाएको छ । ५ गते नै उम्मेदवारको दरखास्तउपर दाबी विरोध र उम्मेदवारले नाम फिर्ता लिने र अन्तिम नामावली प्रकाशन गर्ने कार्यक्रम रहेको छ । 
मतदानका लागि पुस ६ गते बिहान ८ बजेदेखि १० बजेको समय निर्धारण गरिएको समितिका संयोजक भीष्मराज आङ्देम्बेले जानकारी दिए । पार्टी केन्द्रीय कार्यालय सानेपामा हिजो बसेको केन्द्रीय कार्यसम्पादन समिति बैठकले निर्वाचनका लागि सहमहामन्त्री भीष्मराज आङ्देम्बेको संयोजकत्वमा तीन सदस्यीय समिति गठन गर्ने निर्णय गरेको हो ।  
संसदीय दलको विधानबमोजिम काँग्रेसमा दलको नेता बन्न एकभन्दा बढीले उम्मेदवारी दिएमा निर्वाचन प्रक्रिया अपनाउनुपर्छ । काँग्रेसमा अहिले सभापति शेरबहादुर देउवा र महामन्त्री गगन थापाले दलको नेतामा चुनाव लड्ने घोषणा गरिसकेका छन् । संसदीय दलको नेता चयन गर्ने चुनावमा प्रतिनिधिसभामा काँग्रेसबाट निर्वाचित ८९ सांसद मतदाता रहेका छन् ।