कांग्रेसको बागमती प्रदेश संसदीय दलको नेता छान्न निर्वाचन हुने

५ पुस, हेटौंडा । नेपाली कांग्रेसको बागमती प्रदेश संसदीय दल नेता छनौटको लागि निर्वाचन हुने भएको छ । कांग्रेस बागमती प्रदेशको आज मंगलबार बसेको कार्य सम्पादन समितिको बैठकले संसदीय दलको नेता चयनका लागि निर्वाचन गर्ने निर्णय गरेको हो ।
उक्त बैठकले कांग्रेस केन्द्रको संसदीय दलको निर्वाचन पछि मात्र प्रदेशको निर्वाचनको प्रक्रिया सरु गर्ने र मिति तय गर्ने निर्णय गरेको नेपाली कांग्रेस बागमती प्रदेश समितिका प्रवक्ता तिलक रुवालीले जानकारी दिए ।
बैठकले प्रदेश संसदीय दलको नेताको निर्वाचनको लागि समिति समेत गठन गरेको छ । बैठकले कांग्रेस बागमती प्रदेश समितिका उपसभापति समेत रहेका चन्द्र महर्जनको संयोजकत्वमा उक्त समिति गठन गरेको हो । समितिमा ४ जना सदस्य रहेका छन् । 
समितिको सदस्यहरुमा महामन्त्री राजु श्रेष्ठ, सहमहामन्त्री ऋषिराम घिमिरे, सदस्य गंगा दाहाल र सदस्य सानु श्रेष्ठ रहेका छन् । यसैगरी बैठकले स्वच्छ, स्वतन्त्र, निश्पक्ष र भयरहित वातावरणमा निर्वाचन सम्पन्न गर्न भूमिका खेल्ने निर्वाचन आयोग, कर्मचारी, मतदाता, राजनीतिक दल, संचारकर्मी र सरकारलाई धन्यवाद ज्ञापन गर्ने निर्णय गरेको छ । बैठकले बागमती प्रदेशबाट प्रतिनिधिसभा र प्रदेशसभा तर्फका लागि निर्वाचित सांसदहरुलाई आगामी कार्यकालको सफलताको शुभकामनासहित बधाई ज्ञापन गरेको छ ।