बैदेशिक रोजगारबाट फर्किएकाहरुको लागी पुनः एकीकरण कार्यक्रम

८ पुस, हेटौंडा । हेटौंडा उपमहानगरपालिकाको आयोजना तथा सुरक्षित आप्रवासन परियोजना (सामी)को संयोजनमा शुक्रबार हेटौंडामा बैदेशिक रोजगारबाट फर्केका ब्यक्तिहरुका लागि पुनः एकीकरण कार्यक्रमको लागि सरोेकारवालाहरुसँग छलफल तथा अन्तरक्रिया कार्यक्रम भएको छ ।
वैदेशिक रोजगारीबाट फर्केका व्यक्तिहरुलाई आवश्यक योजना तथा कार्यक्रमको विषयमा छलफल गर्ने उद्देश्यले कार्यक्रमको आयोजना गरिएको सामी कार्यक्रमकी संयोजक अंजिता थापा मगरले जानकारी दिइन् । कार्यक्रममा हेटौंडा उपमहानगरपालिका भित्रका १९ वटै वडाका विभिन्न ३ वटा सञ्जालमा आवद्ध रहेका बैदेशिक रोजगारबाट फर्किका ३५ जना महिला तथा पुरुषहरुको सहभागिता रहेको थियो । 
कार्यक्रममा सहभागीहरुले कृषी, पशुपालन, अटोमेकानिकल जस्ता विषयमा क्षमता अभिबृद्धि गर्नुपर्ने, बैंक तथा वित्तिय संस्थाहरुबाट सहज रुपमा ऋण पाउने व्यवस्था गर्नुपर्ने, उत्पादित वस्तुहरुको बजारिकरणको व्यस्था हुनुपर्ने, व्यवसाय संचालनको लागि सहज वातावरण र सीपमूलक कार्यक्रम सञ्चालन गर्नुपर्ने माग गरेका थिए । 
हेटौंडा उपमहानगरपालिकाका सामाजिक विकास महाशाखा प्रमुख भीमप्रसाद तिमल्सिनाले कार्यपत्र प्रस्तुत गरेको कार्यक्रममा आर्थिक विकास महाशाखा गंगा चौलागाई प्रधानमन्त्री रोजगार कार्यक्रमका मकवानपुर संयाजक लगाएतको उपस्थिति रहेको थियो ।