सृजना टोल विकासको साधारणसभा सम्पन्न

२३ पुस, हेटौंडा । हेटौंडा ६ र ७ को सिमानामा रहेको सृजना टोल विकास संस्थाको २१ औँ वार्षिक साधारणसभा शनिबार सम्पन्न भएको छ । संस्थाकी अध्यक्ष जीवकुमारी पौडेलको अध्यक्षता तथा हेटौंडा ६ का वडा सदस्य विजय पौडेलको प्रमुख आतिथ्यतामा कार्यक्रम भएको हो । 
कार्यक्रममा टोल विकास संस्थालाई २१ वर्षसम्म सहयोग पुर्याउने संस्थामा आवद्ध रहेका ज्येष्ठ सदस्य र पूर्व सञ्चालक समितिका सदस्यहरुलाई सम्मान गरिएको थियो । संस्थाले ज्येष्ठ सदस्यमा शान्ति चौलागाई र पार्वती आचार्य, पूर्व सञ्चालक समितिको सदस्य गंगा तिमल्सिना र संस्थाको स्थापना कालदेखी हालसम्म निरन्तर संस्थालाई सहयोग गर्ने दिवाकर आचार्यलाई सम्मान गरिएको थियो । कार्यक्रममा संस्थाका अध्यक्ष पौडेलले सामान्य रुपमा बचत तथा ऋणको कारोवार गर्दैगर्दा ३१ लाखको कारोबार टोल विकास संस्थाले गरिरहेको जानकारी दिईन् । १६५ सदस्य रहेको टोल विकास संस्थामा हेटौंडा ६ र ७ का घरधुरीहरुको आवद्ध छन् । 
टोल विकास संस्थाले टोलको सरसफाई, वृक्षारोपण र अन्य समाजमा आईपरेका समस्याहरु समाधानको पहल गर्ने काम गरेको अध्यक्ष पौडेलले जानकारी दिइन् । कार्यक्रममा हेटौंडा ६ का वडा सदस्य एवम् प्रमुख अतिथि विजय पौडेलले वडा भित्र रहेका २३ वटा टोल विकास संस्थाहरुमध्ये सृजना टोल विकास संस्थाले उत्कृष्ट कार्य गरिरहेको बताए । टोल विकास संस्थाका सदस्यहरुको क्षमता अभिवृद्धिका लागि तालिम र अन्य कार्यक्रमहरुमा वडा कार्यालय सदैव सहयोगको लागि तयार रहेको उनले बताए । कार्यक्रममा टोल विकास संस्था नगर समन्वय समिति सचिव चन्द्रावती पनेरु, हेटौंडा उपमहानगरपालिका समाजिक विकास महाशाखाका उमिता अधिकारी, जनकल्याण सकोसका सचिव रोमप्रसाद न्यौपाने, संस्थाका लेखापरिक्षक प्रल्हाद शर्मा आचार्य लगायतको आतिथ्यता रहेको थियो ।