राष्ट्रनिर्माता पृथ्वीनारायण शाहको ३०१ औं जन्मजयन्ती मनाइँदै

२७ पुस, हेटौंडा । प्रत्येक वर्ष पुस २७ गते मनाइने राष्ट्रनिर्माता पृथ्वीनारायण शाहको जन्मजयन्ती आज विविध कार्यक्रमको आयोजना गरी देशभर मनाइँदैछ । विसं १७७९ पुस २७ गते गोरखामा राजा नरभूपाल शाह र रानी कौशल्यावतीका कोखबाट जन्मिएका पृथ्वीनारायण शाहको ३०१ औँ जन्मजयन्ती मनाइँदैछ । 
विभिन्न टुक्रे राज्यहरुलाई एकतामा बाधि पृथ्वी नारायण शाहाले नेपालको एकिकरण गरेका थिए । उनी विसं १७९९ चैत २५ गते गोर्खाका राजा भएपछि एकिकरणको सुरुवात गरेका थिए ।
पृथ्वीनारायण शाहा राजा भएपछि पूर्वमा टिस्टादेखि पश्चिममा चेपे नदीसम्म नेपालको सीमा विस्तार गर्न सफल भएका थिए । पृथ्वीनारायणको शेषपछि पनि उनका उत्तराधिकारीहरुले पश्चिममा किल्ला काँगडासम्म नेपाल राज्यलाई विस्तार गरेको इतिहास छ । 
पृथ्वीनारायण शाहले विसं १८०१ मा नुवाकोट विजय गरेर एकिकरणको सुरुवात गरेका थिए । त्यसको २५ वर्षपछि १८२६ सालमा काठमाडौँ उपत्यका विजय हासिल गरेका पृथ्वीनारायण शाहले पूर्वतिरका चौदण्डी विजयपुर लगाएत क्षेत्र नेपालमा गाभेर देशको सिमाना बढाएका थिए ।
सबै जातजाति, भाषाभाषीको सहयोग लिएर नेपाल एकीकरणको सुरुवात गरेका पृथ्वीनारायण शाहको सम्झनामा आज देशभर विभिन्न कार्यक्रम गरी ३०१ औँ जन्मजयन्ती मनाइँदैछ । यस अवसरमा सरकारले आज सार्वजनिक बिदा पनि दिएको छ ।