बागमतीमा सभामुखको निर्वाचनका लागि आज उम्मेदवारी दर्ता हुँदै

२८ पुस, हेटौंडा । बागमती प्रदेश सभाको सभामुख पदको लागि आज उम्मेदवारी दर्ता हुँदै छ । सत्ता गठबन्धनका तर्फबाट राप्रपाका भुवन पाठक सभामुखको उम्मेदवार बन्ने भएका छन् । उनलाई राप्रपाले उम्मेदवार बनाउने निर्णय गरेको हो ।
यस्तै सता समीकरण मिलाउने क्रममा गठबन्धनले बागमती प्रदेशमा मुख्यमन्त्री माओवादी, सभामुख राप्रपा र उपसभामुख एमालेले पाउने सहमति भएको थियो । सोही अनुसार माओवादीले मुख्यमन्त्री पाइसकेको छ भने आज सभामुख पदको लागि उम्मेदवारी दर्ता हुन लागेको हो । निर्वाचन भने भोलि शुक्रबार हुने प्रदेश सभा सचिवालयले जनाएको छ । 
यता कांग्रेस पनि सभामुखको उम्मेदवारीको विषयमा छलफलमै रहेको कांग्रेस बागमती प्रदेश समितिका प्रवक्ता तिलक रुवालीले जानकारी दिए। उनले सभामुखमा उम्मेदवारी दिने भए पनि उम्मेदवार को हुने भन्नेबारेमा छलफल भइरहेको बताए। बिहीबार उम्मेदवारको मनोनयन गर्ने समय अघि नै उम्मेदवार टुंगिने उनले दाबी गरे ।
प्रदेश सभा सचिवालयले दिएको जानकारीअनुसार बिहीबार बिहान १०ः३० बजेदेखि २ बजेसम्म उम्मेदवारी दर्ता गर्ने समय निर्धारण गरिएको छ। दिनको २ः३० बजेदेखि ३ः३० बजेसम्म उम्मेदवारले नाम फिर्ता लिने समय तोकिएको छ। 
यसैगरी, आजै अपराह्न ४ बजेभित्र सभामुख पदको उममेदवार दर्ता गरिएको अन्तिम नामावलीको सूची प्रकाशन गर्ने कार्यतालिका रहेको प्रदेश सभा सचिवालयका सचिव कृष्णहरि खड्काले जानकारी दिए।
सभामुख पदको उम्मेदवारी निर्विरोध भएमा वा मतदान गर्नुपरेमा पुस २९ गते दिनको ११ बजे प्रदेश सभाको बैठक बोलाइएको छ भने सोही दिन चुनावी परिणाम घोषणा गर्ने कार्यसूची रहेको प्रदेश सभा सचिवालयका प्रमुख सचिव कृष्णहरि खड्काले बताए। 
बागमती प्रदेश सभामा अहिले कांग्रेसका ३७, नेकपा (एमाले) का २७, नेकपा (माओवादी केन्द्र) का २१, राष्ट्रिय प्रजातन्त्र पार्टीका १३, नेकपा (एकीकृत समाजवादी) का सात, नेपाल मजदुर किसान पार्टीका तीन र हाम्रो नेपाली पार्टीका दुई गरी एक सय १० जना प्रदेश सभाका सदस्य छन् ।