अशोक सामुदायिक वनको वार्षिक भेला सम्पन्न

३० पुस,हेटौंडा। हेटौडा– १७ राजदेवीमा रहेको अशोक सामुदायिक वन उपभोक्ता समूहको २८ औं वार्षिक साधारणसभा शनिवार सम्पन्न भएको छ ।हेटौडा–१७ का वडा सदस्य नवराज न्यौपानेको प्रमुख आतिथ्यता एवम समूहका अध्यक्ष बलराम अधिकारीको सभाध्यक्षतामा साधारणसभा भएको हो।

सभामा समूहका अध्यक्ष अधिकारीले प्रगति प्रतिवेदन, लेखा समितिका संयोजक भीमप्रसाद अधिकारीले लेखा समितिको प्रतिवेदन र कोषाध्यक्ष चोपलाल धमालाले चालु आर्थिक वर्ष २०७९।०८० को लागि ४२ लाख ४२ हजारको आयव्यय विवरण पेश गरेका थिए ।

भेलामा ज्येष्ठ उपभोक्ता विष्णुमाया पराजुली र नेत्रप्रसाद तिमल्सिनालाई दोसल्ला ओढाएर सम्मानित गरिएको थियो । यसैगरि २०७८ सालको एसईई परीक्षामा उत्कृष्ट अंक हासिल गर्ने पूजा लम्साल र आशिष गौतम जेहेन्दार विद्यार्थी अश्विन धमला र शर्मिला पाण्डेलाई पुरस्कृत गरिएको थियो ।

साधारणसभामा सव डिभिजन वन कार्यालय, हर्नामाडीका सहायक वन अधिकृत दीपक प्रसाद पुडासैनी, समूहका संस्थापक अध्यक्ष कृष्ण प्रसाद नेपाल, रानी सामुदायिक वनका अध्यक्ष विष्णुप्रसाद न्यौपाने, चुच्चेखोला सामुदायिक वनका अध्यक्ष लक्ष्मण कटुवाल, राजदेवी दुग्ध सहकारीका अध्यक्ष राम प्रसाद तिमल्सिना, राजदेवी बचत तथा ऋण सहकारीका अध्यक्ष मधुसुदन न्यौपाने, राजदेवी माविका प्रअ सानुकाजी पाण्डे, समूहकी सचिव उर्मिला पुलामी, सञ्चारकर्मी भीमसेन पौडेल लगायतको उपस्थिति रहेको थियो ।