सुस्मिता हत्याकाण्ड: ससुरा, नन्दद्वय, ज्वाईलाई जन्मकैद, सासुलाई १० बर्ष कैद

६ माघ, हेटौंडा । जिल्ला अदालत मकवानपुरले हेटौंडा - ४ की २४ वर्षीया सुस्मिता केसीको हत्यामा परिवारकै व्यक्ती संलग्न भएको ठहर गर्दै घटनामा संलग्न मृतक केसीकी ससुरा, नन्दद्वय र ज्वाइँलाई जन्मकैद फैसला सुनाएको छ।

जिल्ला अदालत मकवानपुरका न्यायाधीश श्रीप्रसाद सन्जेलको शुक्रबार बसेको ईजलासले सुस्मिता हत्यामा संलग्न उनकी ससुरा ५८ बर्षीय प्रकाश थापा,जेठी २७ बर्षीया नन्द दुर्गा थापा, कान्छी नन्द २३ बर्षीया सीता थापा र ज्वाइँ अरुण कार्कीलाई जनही २५ वर्ष जन्मकैदको फैसला गरेको छ भने सुस्मिताकी   सासू  ५० वर्षीया तुलसाकुमारी थापालाई हत्याको मतियार  ठहर गर्दै १० वर्ष कैदको फैसला गरेको हो ।

२०७७ असार १ गते राति हेटौंडा उपमहानगरपालिका ४ कर्रास्थित घरमा बीभत्स ढंगले हत्या गरिएको अवस्थामा सुस्मिताको शव भान्सा कोठामा फेला परेको थियो। प्रहरीले घटना भएको केही दिनमै हत्या आरोपमा निजकी ससुरा, सासु, दुईजना नन्दलाई पक्राउ गरेको थियो भने ज्वाइँले केही महिनापछि मकवानपुर प्रहरी समक्ष आत्मसमर्पण गरेका थिए। खाना खाइरहेकी सुस्मिताको टाउकोमा ससुरा,नन्द मिलेर पछाडिबाट काठले हिर्काएर हत्या गरेको प्रहरी अनुसन्धानमा खुलेको थियो ।

यस अघी पुर्पक्षमा रहेका मृतकका ५८ वर्षीय ससुरा प्रकाश थापा, ५० वर्षीय सासू तुलसा, नन्दहरू २७ वर्षीय दुर्गा, दुर्गाका श्रीमान अरुण कार्की र २३ वर्षीय नन्द सीता थापालाई पुस २३ गते जिल्ला अदालत मकवानपुरले दोषी ठहर गरेको थियो।पुर्पक्षका लागि थुनामा रहेका उनीहरुलाई पुस २३ गते न्यायाधीश श्रीप्रसाद सञ्जेलको एकल इजलासले  दोषी ठहर गरेको थियो।