निकुञ्ज र स्थानीय तहले मिलेर काम गर्नुपर्छः मुख्यमन्त्री

१९ फागुन,  हेटौंडा । बागमती प्रदेशका मुख्यमन्त्री शालिकराम जम्कट्टेलले राष्ट्रिय निकुञ्जले स्थानीय तहसँग मिलेर काम गर्नु जरुरी रहेको सुझाव दिएका छन् । 
जिल्ला समन्वय समिति मकवानपुर एवम् डिभिजन वन कार्यालय मकवानपुर र राप्तीले बिहीबार हेटौंडामा आयोजना गरेको मानव वन्यजन्तु द्वन्द्व एवम् वन डँढेलो न्यूनीकरण सम्बन्धि अन्तरक्रियामा उनले निकुञ्ज र सर्वसाधारणको बीचमा राम्रो सम्बन्ध हुन नसक्नु दुःखद् भएको धारणा राखे । 
जनप्रतिनिधिको अनुरोधलाई निकुञ्जका कर्मचारीले अटेर गर्ने गरेको गुनासो आएको भन्दै उनले स्थानीय तहसँग समन्वय गरी काम गर्न अनुरोध गरे । वन फँडानी, आहाराको अभाव लगायतका कारणले वन्यजन्तु बाँच्नकै लागि गाउँवस्तीमा छिर्ने गरेको जम्कट्टेलको दावी थियो । 
यस्तै गर्मी मौसम बढेसँगै डँडेलोको समस्या सुरु हुने भन्दै उनले यसका लागि जनचेतना आवश्यक रहेकोमा जोड दिए । 
जिल्ला समन्वय समिति मकवानपुर प्रमुख ललितबहादुर घलानको अध्यक्षतामा भएको कार्यक्रममा बागमती प्रदेशसभा सदस्य प्रेमबहादुर पुलामी छिन्तुले वन्यजन्तुको संरक्षण गर्दै मानवीय क्षती रोक्नतर्फ लाग्नुपर्ने धारणा राखे । 
समन्वय समितिका उपप्रमुख सानुकाजी लुइँटेलले वन्यजन्तु नियन्त्रण, समन्वय लगायतका बिषयमा कर्मचारीले जनप्रतिनिधिको कुरा नमान्ने गरेको धारणा राखे । मकवानपुरका प्रमुख जिल्ला अधिकारी राजेन्द्रदेव पाण्डेले प्रशासनले वन्यजन्तुको संरक्षणसँगै धनजनको क्षति हुन नदिन लागिपरेको बताए ।