नेपालको पानीजहाज चल्ने भयो रे...

१३ भदौ, हेटौँडा । पूर्व प्रधानमन्त्री केपि शर्मा ओलीले आफ्नो कार्यकालमा विकासका धेरै विषय उठाए । त्यसमध्ये नेपालले महासागरमा पानीजहाज चलाउने भन्दै उनले भाषण गरेका थिए । पूर्वप्रधानमन्त्री ओलीको भाषणलाई लिएर यसपाली तीजको गीत बजारमा आएका छन् । धनकुमारी थापा ‘सरु’ ले ‘नेपालको पानीजहाज’ एल्बम बजारमा ल्याएकी छिन् । मनोजसिंह धामीको शव्द/संगित रहेको गीतमा भनिएको छ ।
पूर्वपश्चिम रेल चाईनाबाट तेल, नेपालको पानीजहाज चल्ने भयो रे
नेता ज्यूले भनेको नेपालको पानीजहाज चल्ने भयो रे ।
हाँस्यकलाकार दमन रुपाखेतिलाई भिडियोमा प्रस्तुत गरिएको गीतमा सर्टिफिकेट राखेर ऋण, हावाबाट विजुली, घरघरमा ग्याँसको पाईप जस्ता विषयलाई पनि व्यंग्यात्मक रुपमा प्रस्तुत गरिएको छ । कृषिमा लगानी गर्ने भनिएको विषय पनि गीतमा उल्लेख छ ।
युवा विदेश बाँझै छ जग्गा नि, गर्ने अरे कृषिमा लगानी
हावाबाट विजुली बल्ने भयो रे ।
सर्वसाधारणले भने धाराको पाईपमा पानी नआउने जमानामा ग्याँस पाईने भो भन्दै व्यंग्य गरेका छन् । उनीहरुले जाजरकोटमा जीवनजल नपाउँदा पखाला लागेर जनताले मृत्युवरण गर्नुपरेको विषयलाई समेत उठाएका छन् ।
त्यसैगरी, गायक सितल शर्माले ‘पानीजहाज’ बजारमा ल्याएका छन् । उनले पनि ओलीका विकासे भाषणलाई प्रस्तुत गरेका छन् ।
हाम्रो देशले पानीजहाज चलाउने भा छ, नपत्याए हेर मैया पत्रिकामा आ’छ
अब त हामी को भन्दा कम....
हाँस्यकलाकार राजु मास्टरलाई भिडियोमा प्रस्तुत गरिएको गीतमा ग्याँस सिद्धिएको विषयलाई प्रस्तुत गर्दै भनिएको छ ।
भान्सा कोठा ग्याँसको पाईप जोड्ने आ’छ हल्ला, बोक्न अब नपर्ने भो सिलिण्डरका डल्ला ।
ओल्लो डाँडा पल्लो डाँडा केबुलकारमा सुत्त, काठमाण्डौंमा छिरेपछि हेटौँडामा फुत्त ।
दैलेखमा खानी पत्ता लाग्यो भन्छन् तेलको, काठमाण्डौंमा चर्चा चल्न थाल्यो मेट्रो रेलको ।
दुबै गीतमा पूर्व प्रधानमन्त्री ओलीले सुनाएका आफ्नो विकासे योजना सफल भईदिए जनतालाई लाभ हुने अपेक्षा गरिएको छ । तर सानातिना समस्या नै समाधान हुन नसकिएको अवस्थामा गरिएको विकासे भाषणलाई आशंकाको दृष्टिकोणले हेरिएको छ ।