हास्यव्यंग्य कविता प्रतियोगितामा भक्तपुरका डिल्लीराम प्रथम

२२ बैशाख, हेटौंडा । सिस्नुपानी नेपाल मकवानपुरको आयोजनामा शुक्रबार हेटौंडामा सम्पन्न राष्ट्रव्यापी खुल्ला हास्यव्यंग्य कविता प्रतियोगितामा भक्तपुरका डिल्लीप्रसाद ‘मुलतिहुन’प्रथम भएका छन् ।
सिस्नुपानी नेपालको स्थापना दिवसको अवसरमा आयोजित हास्यव्यङ्य कबित प्रतियोगितामा विजयी मुलतिहुनले ‘जाँडरक्सी महोत्सव’ शिर्षकको कविता वाचन गरेका थिए । उनले पुरस्कार स्वरुप नगद १५ हजार रुयैयाँ प्राप्त गरे ।
यस्तै प्रतियोगितामा मकवानपुरका प्रभाव घिमिरे र सुनसरीका सुरज पराजुली क्रमश द्वितिय र तृतीय हुँदा कास्कीका संयोग बस्याल र पाँचथरका कमल घिमिरे सान्त्वन भए । द्वितिय, तृतीय र सान्त्वना हुनेहरुले क्रमश १० हजार, ५ हजार र ३ हजार नगद पुरस्कार प्राप्त गरे ।
प्रतियोगितामा देशभरका विभिन्न जिल्लाबाट ८१ जना कविका कविताहरुबाट प्रतियोगिताका लागी २५ जनाको कविता छनौट गरिएको सिस्नुपानी नेपाल मकवानपुरका अध्यक्ष राजकुमार लामिछानेले जानकारी दिए ।
प्रतियोगिताको निर्णायकमा कार्यक्रमका प्रमुख अतिथि समेत रहेका सिस्नुपानी नेपालका संस्थापक अध्यक्ष नरनाथ लुइटेल, सर्जक सञ्जाल मकवानपुरका संयोजक निमेष निखिल रहेका थिए । 
हेटौंडा उपमहानगरपालिका वडा नम्बर ४ को मूल अयोजनामा भएको प्रतियोगितामा सिस्नुपानी नेपालका केन्द्रीय सचिव सरोज घिमिरे, हेटौंडा ४ का वडा अध्यक्ष नवीन सिग्देल, आँचल साहित्यकला पुञ्जकी अध्यक्ष भावना सापकोटा लगाएतको उपस्थिति रहेको थियो ।