स्थानीय विपद कोषमा एक करोड जम्मा गर्ने प्रदेश सरकारको निर्णय

१५ जेठ, हेटौंडा । बागमती प्रदेश सरकारले स्थानीय विपद कोषमा एक करोड रुपैयाँ जम्मा गर्ने निर्णय गरेको छ । आइतबार बसेको मन्त्रिपरिषद् बैठकले यस्तो निर्णय गरेको प्रदेश सरकार आन्तरिक मामिला तथा कानुनमन्त्री गंगानारायण श्रेष्ठले जानकारी दिए ।
यस्तै प्रदेश सरकारले प्राकृतिक विपद् तथा जोखिम न्यूनीकरणका लागि स्थानीय तहहरुलाई थप सशर्त अनुदान दिने र प्रदेश भित्रका ५ जिल्लाका विभिन्न ५ स्थानमा निर्माण हुने प्रहरी इकाई भवनको निर्माणको लागी खर्च अख्तियारी दिने निर्णय पनि गरेको छ ।
प्रदेश सरकारले दोलखाको गौरीशंकर गाउँपालिका, रामेछापको गोकुलगंगा गाउँपालिका, सिन्धुपाल्चोकको बाह्रबिसे नगरपालिका, नुवाकोटको म्याङ्लुङ गाउँपालिका, रसुवाको नौकुण्ड गाउँपालिका, धादिङको त्रिपुरासुन्दरी गाउँपालिका, काभ्रेको बेथानचोक गाउँपालिका, मकवानपुरको राक्सिराङ गाउँपालिका, सिन्धुलीको मरिण गाउँपालिका र चितवनको इच्छाकामना गाउँपालिकालाई दश÷दश लाख रुपैयाँ विनियोजन गर्ने निर्णय गरेको छ । 
बैठकले प्राकृतिक विपद् तथा जोखिम न्यूनीकरणका लागि स्थानीय तहहरुलाई थप सशर्त अनुदान समेत दिने निर्णय गरेको छ । बैठकले विपद् तथा जोखिम न्यूनीकरणका लागि प्रदेशका ३ वटा स्थानीय तहलाई कुल १ करोड ९० लाख रुपैयाँ सशर्त अनुदान दिने निर्णय गरेको हो । 
उक्त अनुदान नुवाकोटको म्यागङ र दुप्चेश्वर गाउँपालिकालाई क्रमशः ३० लाख र एक करोड १० लाख रुपैयाँ र मकवानपुरको मकवानपुरगढी गाउँपालिकालाई ५० लाख रुपैयाँ दिने निर्णय गरेको हो । 
यसैगरी बैठकले विज्ञान प्रबिधि नवप्रवर्तन तथा विकास कोष सञ्चालन सम्बन्धि विधेयक तर्जुमा सम्बन्धमा सैद्धान्तिक स्वीकृति दिने र केही दिन अघि सिन्धुली अस्पतालमा भएको घटनाका कारण पुगेको भौतिक संरचनाको क्षतिलाई बनाउन १० लाख रुपैयाँ दिने निर्णय पनि गरेको छ ।