रहेनन् ‘आहा नगर’का परिकल्पनाकार

१४ भदौ, हेटौँडा । चित्लाङका गाविस सचिव तपराज जोशीको निधन भएको छ । उपचारका क्रममा सोमबार बेलुका उनको निधन भएको हो । 
उच्च ज्वरो आएपछि काठमाण्डौंस्थित शिक्षण अस्पतालमा एक साता अघिदेखि उपचार गराईरहेका उनको उपचारका क्रममा निधन भएको सहकर्मी एवं टिष्टुङ गाविस सचिव राजेन्द्र चौलागाईले बताए । जोशीको मंगलबार पशुपति आर्यघाटमा अन्त्यष्टि गरिएको छ । विगत तीन बर्षदेखि चित्लाङ गाविस सचिवको जिम्मेवारी सम्हालेका जोशी अत्यन्तै मिलानसार मानिन्थे । मृदुभाषी जोशी गाउँमै रहेर सेवाग्राहीको सेवा गर्न मन पराउने कर्मचारी रहेको स्थानीयको भनाई छ । 
दुई बर्ष अघि संचारकर्मीहरुसँगको भेटमा उनले थाहा नगरपालिकाले नसमेटेका गाविसहरु चित्लाङ, मार्खु र कुलेखानीलाई समेटेर ‘आहा नगरपालिका’ बनाउनुपर्ने परिकल्पना सुनाएका थिए । उनले यो क्षेत्रलाई उदाहरणिय बनाउने सोच रहेकाले नाम पनि ‘आहा’ राख्नुपर्ने बताएका थिए । नगरपालिका बनेपछि विकासका योजनालाई व्यवस्थित ढंगबाट अघि बढाउन सकिने भन्दै राजधानीबाट नजिकै रहेको र सडक सञ्जाल पूर्वाधार समेत रहेकाले पनि तीन गाविसलाई समेटेर नगरपालिका बनाउने पर्ने उनको तर्क थियो । उनी मकवानपुरे संचारकर्मीलाई चित्लाङमा रहेका धार्मिक एवं प्राकृतिक महत्वबारे ‘हाईलाईट’ गर्न झकझकाई रहन्थे । आक्कलझुक्कल सदरमुकाम हेटौँडा आउँदा पनि उनी यस विषयमा सरोकारवालाहरुसँग छलफल गर्ने गर्थे ।
पर्यटकिय क्षेत्र भएकाले चित्लाङ, मार्खु र कुलेखानीमा पर्यटन प्रवद्र्धनबाटै विकास गर्न सकिने धारणा नेपाल पत्रकार महासंघ मकवानपुरले चित्लाङ गरेको बैठकका क्रममा पनि उनले योजना सुनाएका थिए । उनका श्रीमति र एक छोरा छन् । जोशीको निधनप्रति सामाजिक सञ्जालमार्फत शुभेच्छुक शुभचिन्तकले दुःख व्यक्त गरेका छन् ।