प्रदेशको बजेटप्रति हेटौंडाका वडा अध्यक्षहरु आक्रोशित

३ असार, हेटौंडा । बागमती प्रदेश सरकारले आर्थिक वर्ष २०८०÷८१ का लागि ल्याएको बजेटले आफ्नो वडाहरुलाई उपेक्षा गरेको भन्दै एमालेबाट निर्वाचित भएका हेटौंडा उपमहानगरका वडा अध्यक्षहरु आक्रोशित बनेका छन् । 
उनीहरुले शनिबार हेटौंडामा पत्रकार सम्मेलन गर्दै समग्र हेटौंडालाई नै उपेक्षा गर्ने गरी बजेट ल्याइएको भन्दै आपत्ति जनाएका छन् । उनीहरुले विरोधका कार्यक्रम सार्वजनिक गर्ने सम्मको चेतावती दिएका छन् । प्रदेश सरकारको बजेट पूर्वाग्रही, उपेक्षित र राजनीतिक प्रतिशोधको आधारमा ल्याइएको उनीहरुको आरोप छ । 
हेटौंडा १४ नम्बर वडा अध्यक्ष दीपक खड्काले हेटौंडालाई उपेक्षित गर्ने गरी बजेट ल्याइएको भन्दै आक्रोश पोखे । १÷२ वडा बाहेक सबैमा न्यून बजेट विनियोजन गरिएको उनको आक्रोश थियो । प्रदेशका मन्त्री बहिस्कार अभियान चलाइने उनले चेतावनी दिए । 
हेटौंडा १५ नम्बर वडा अध्यक्ष सुनिल मोक्तानले बजेटमा राजनीतिकरण गरिएको आरोप लगाए । एकाध वडा बाहेक समग्र बजेट नै सन्तोषजनक नभएकोले संशोधन गर्नुपर्ने उनको माग थियो । हेटौंडा १० नम्बर वडा अध्यक्ष फुर्वादोर्जे लामाले प्रदेशसभा सचिवालय र केही मन्त्रालय आफ्नै वडामा रहेपनि बजेट भने शून्य रहेको भन्दै आपत्ति जनाए । १० नम्बर वडाले प्रदेशको राजधानी कस्तो छ भन्ने देखाउने भन्दै लामाले बजेट संशोधनको माग गरे । 
यस्तै १९ नम्बर वडा अध्यक्ष नरनाथ सुवेदी ‘नवराज’ले बजेट बजेट पूर्वाग्रही र कनिका छराई भएको आरोप लगाए । बजेटले पूर्वाधारलाई जोड्न नसकेको उनको भनाई थियो । १९ नम्बर वडाबाट जिल्लाको विकट कैलाश र राक्सिराङ जाने वैकल्पिक र छोटो बाटोलाई बजेट विनियोजन गरेको भन्दै उनले आपत्ति जनाए । 
यस्तै ५ नम्बर वडा अध्यक्ष सुशील घिमिरेले बजेट निर्माणको क्रममा वडा अध्यक्षहरुसँग कुनै सुझाव नलिएको र अत्यावश्यक स्थानमा समेत बजेट विनियोजन नगरिएको गुनासो गरे । 
११ नम्बर वडा अध्यक्ष जुना दाहाल र १३ नम्बर वडा अध्यक्ष पेम्बा लामाले प्रदेश सरकारले वडामा २÷५ लाख सम्मको बजेट विनियोजन गरेर प्रदेशको औचित्य माथि नै प्रश्न चिन्ह खडा गर्ने काम गरेको बताए । राजनीतिक पहुँच र आग्रह पूर्वाग्रहको आधारमा बजेट विनियोजन गरिएकोप्रति आपत्ति रहेको उनीहरुको भनाई थियो ।