बृहत नागरिक आन्दोलनद्वारा काठमाडौं जिल्ला अदालत परिसर अगाडि प्रदर्शन

५ असार, काठमाडौं । आमरण अनशनरत उपप्राध्यापक प्रेमबहादुर चलाउनेको समर्थन र उनको मागमा ऐक्यबद्धता जनाउँदै प्रदर्शनहरु शुरु भएको छ । मंगलबार बिहान बृहत नागरिक आन्दोलनले काठमाडौं जिल्ला अदालत परिसर अगाडि बबरमहल र प्राध्यापकहरूले त्रिभुवन विश्वविद्यालय कीर्तिपुरमा प्रदर्शन गरेका हुन् ।
चलाउनेलाई २०७७ असोज २० गते सांघातिक हमला गर्ने ‘गुन्डा’हरूलाई मन्त्रिपरिषद्को बैठकले उन्मुक्ति दिने निर्णय गरेमा त्यसको विरोधमा प्रदर्शन गरिएको नागरिक आन्दोलनले जनाएको छ । विश्वविद्यालयलाई हिंसारहित बनाउन र पीडित चलाउनेलाई न्याय दिलाउन नागरिक आन्दोलनका अभियन्ताहरू अदालत परिसरमा जुटेका थिए ।
त्यस्तै प्रगतिशील प्राध्यापक संगठनले त्रिविको उपकुलपति कार्यालय अगाडि प्रदर्शन गरेको प्राध्यापक रमेश भट्टराईले जनाकारी दिए । सोही स्थानमा सोमबार साँझदेखि चलाउनेले अनशन सुरु गरेका छन् ।
चलाउनेलाई न्याय दिन र उनको मागमा ऐक्यवद्धता जनाउन प्रदर्शन गरिएको भट्टराईले बताए । सरकारले मुद्दा फिर्ता गर्ने निर्णय गरेपछि चलाउने सोमबार अदालत पुग्दा प्रहरी नियन्त्रणमा लिएर ४ घण्टापछि छाडेको थियो । त्यसपछि उनी अनशन बस्नका लागि कीर्तिपुर पुगेका हुन् । तीन वर्षअघि आफ्नो ज्यान लिने उद्देश्यले भएको घटनाका अभियुक्तलाई उम्काउने गरी सरकारले मुद्दा फिर्ता लिने निर्णय गरेको उनको भनाइ छ । उनीमाथि नेपाल विद्यार्थी संघका कार्यकर्ताले त्रिवि परिषद्को नेपाल बैंक अगाडि सांघातिक हमाल गरेर घाइते पारेका थिए । (ईकान्तिपुरबाट)