हेटौंडा-६ को बक्तृत्वकला प्रतियोगितामा अधिकारी प्रथम

९ असार, हेटौंडा । वडा स्तरीय बाल सञ्चाल हेटौंडा-६ को आयोजनामा 'बालविवाह अन्त्यका लागि बालबालिकाको भूमिका' विषयक बक्तृत्वकला प्रतियोगिता सम्पन्न भएको छ । 
प्रतियोगितामा रमा अधिकारी प्रथम, श्रीयान्सी पौडेले द्वितीय, प्रकृति लामिछाने तृतीय र सुवर्ण बर्तौला सान्त्वना भएका छन् । प्रतियोगितामा विजेता हुने बालबालिकहरुले क्रमशः नगद २ हजार, १ हजार ५ सय, १ हजार र ५ सय रुपैयाँसहित प्रमाणपत्र प्राप्त गरेका छन् । वडा स्तरीय बाल सञ्जाल हेटौंडा-६ की अध्यक्ष रोजी सुवेदीको अध्यक्षतामा भएको कार्यक्रममा हेटौंडा-६ की वडा सदस्य एवं बालमैत्री सम्पर्क व्यक्ति सरिता सापकोटाको प्रमुख आतिथ्यता रहेको थियो । प्रतियोगितामा ६ नम्बर वडाभित्र रहेका १७ वटा बाल समूहबाट एक/एक जना बालबालिकाहरुले सहभागिता जनाएका थिए ।
कार्यक्रममा हेटौंडा ६ का वडा सदस्य विजय पौडेल, मुना विश्वकर्मा, लेखराज ढकाल, हेटौंडा ६ का वडा सचिव अमोदप्रसाद मैनाली, टोल विकास संस्था वडा समन्वय समितिका सचिव राजकुमार फुयाँल, वंशगोपाल माध्यामिक विद्यालयका प्रधानाध्यापक रमेशप्रसाद लामिछाने, मुनलाइट इन्टरनेशनल स्कूलका सञ्चालक भरत सापकोटा लगायतको आतिथ्यता रहेको थियो ।
प्रतियोगितामा निर्णायकको रुपमा गणेशकुमार श्रेष्ठ, रुपेश दुलाल र शिवदयाल यादव रहेका थिए । हेटौंडा उपमहानगरपालिकालाई २०८० साल मंसिर मसान्तभित्र बालमैत्री स्थानीय शासनयुक्त नगर घोषणा गर्ने अभियान अन्तरगत १९ वटै वडामा बक्तृत्वकला प्रतियोगिता भएको हो । हेटौंडा उपमहानगरपालिका ६ नम्बर वडालाई पनि २०८० भदौ २९ गते बालमैत्री स्थानीय शासनयुक्त वडा घोषणा गर्ने तयारी भईरहेको बालमैत्री वडा सहजकर्ता रुजा सुवेदीले जानकारी दिइन् । वडालाई बालमैत्री शासनयुक्त घोषणाको लागि टोल अभिमुखीकरण कार्यक्रम वडामा भईरहेको उनले जानकारी दिइन् ।