मन्त्रालयको कार्यक्रमले अपांगको उत्थान हुन सक्दैनः प्रदेश अध्यक्ष लम्साल

१४ असार, हेटौंडा । राष्ट्रिय अपांग महासंघ बागमती प्रदेश अध्यक्ष अस्विन लम्सालले सामाजिक विकास मन्त्रालयले ल्याएको अधिकांश कार्यक्रमले अपांगता भएकाहरुको उत्थान हुन नसक्ने बताएका छन् । 
बुधबार हेटौंडामा भएको अपांगता भएका व्यक्तिहरुको सवाल कार्यान्वयनमा देखिएको समस्या, चुनौती र समाधानको उपाय सम्बन्धि पत्रकारहरुसँग अन्तरकृयामा अध्यक्ष लम्सालले सामाजिक विकास मन्त्रालयको अधिकांश कार्यक्रम झारा टार्ने खालको मात्र भएको टिप्पणी गरेका हुन् । 
आर्थिक वर्ष २०८०÷८१ का लागि प्रदेश सरकारले विनियोजन गरेको बजेटले अपांगताको क्षेत्रलाई अर्थपूर्ण रुपमा समेट्न नसकेको भन्दै उनले बजेट संशोधनको माग समेत गरेका छन् । 
राष्ट्रिय अपांग महासंघ बागमती प्रदेशका व्यवस्थापक सीता मल्लले पहुँचयुक्त संरचना नहुँदा अपांगता भएकाहरुले समस्या झेल्दै आएको बताइन् । 
प्रदेश सरकारले निजामति सेवा प्रवेशमा समेत अपांगको कोटा कटाउन खोजेको जानकारी दिइन् । यसको विरुद्ध सर्वोच्चमा जाने तयारी रहेको जानकारी दिइएको छ ।
अपांगमैत्री संरचना, कानून र व्यवहार आवश्यक रहेको प्रदेश व्यवस्थापक मल्लको भनाई थियो । बागमती प्रदेशसभामा एकजना अपांग भएका प्रदेशसभा सदस्य रहेकोमा उनले अपांगमैत्री संरचना नहुँदा अनेक समस्या झेल्नुपरेको जानकारी दिइएको छ । 
२०७८ को जनगणना अनुसार नेपालमा २ दशमलव २५ प्रतिशत अपांगता भएका व्यक्तिहरु रहेका छन् ।