हेटौंडा अस्पताललाई ८८ लाखको सामग्री सहयोग

१४ असार, हेटौंडा । रोटरी क्लव अफ मकवानपुरले हेटौंडा अस्पताललाई साढे ८८ लाख रुपैयाँ बराबरको विभिन्न सामग्री सहयोग गरेको छ । 
अस्पतालको सेवा प्रवाहमा थप सहयोग पु¥याउने उद्देश्यसहित रोटरीले विभिन्न आवश्यक सामग्री सहयोग गरेको हो । ८८ लाख ६० हजार ४७२ रुपैयाँको सामग्री बुधबार एक कार्यक्रमकाबीच अस्पताललाई हस्तान्तरण गरिएको हो । 
मुटु सम्वन्धी स्वास्थ्य समस्या भएकाहरुको उपचारमा सहयोग गर्ने उद्देस्यले विविध स्वास्थ्य सामाग्री हस्तान्तरण गरिएको रोटरी क्लब अफ मकवानपुरका अध्यक्ष कृष्णबहादुर कार्कीले जानकारी दिए । 
यसमा हेटौंडा उपमहानगरपालिका सहित विभिन्न देशमा रहेका रोटरीयनहरुले सहयोग गरेका छन् । रोटरीले उपचारका लागि इकोकार्डियो मेसिन हस्तान्तरण गरेको हो । इकोकार्डियोसहित रोटरीले टिएमटी स्क्यान, इसीजी मेसिन, होल्टर सिस्टम मेसिन लगायतका सामग्री हस्तान्तरण गरेको हो । 
सामग्री सहयोगपछी अब हेटौंडा अस्पतालमा मुटु सम्वन्धि उपचार गर्नुपर्ने बिरामीका लागि सहज हुने मदन भण्डारी स्वास्थ्य विज्ञान प्रतिष्ठानका रजिष्टार राजेश प्रसाईले बताए । 
हेटौंडा अस्पताललाई अहिले मदन भण्डारी स्वास्थ्य विज्ञान प्रतिष्ठानले सञ्चालन गरिरहेको छ । सामग्री हस्तान्तरणको विषयमा पत्रकार सम्मेलनमार्फत जानकारी दिइएको थियो । अस्पतालको सेवामा थप टेवा पु¥याउने उद्देश्यले सामग्री सहयोग हस्तान्तरण गरिएको रोटरीका अध्यक्ष कार्कीको भनाई छ । 
सहयोग सामग्री अन्तरणमा हेटौंडा अस्पतालका मेडिकल सुपरीटेण्डेन्ट डा.रामचन्द्र सापकोटा, नेपाल पत्रकार महासंघ बागमती प्रदेशका संस्थापक अध्यक्ष प्रताप विष्ट लगायतकाले हेटौंडा अस्पतालको गुणस्तरीय सेवाका लागि सबैको साथ, सहयोग जरुरी रहेको बताएका थिए ।