सिद्धार्थका एसईई विद्यार्थीलाई वडा कार्यालय र विद्यालयको नगद सहित सम्मान

२६ असार,हेटौँडा । हेटौैंडा–२ सिद्धार्थपथमा रहेको सिद्धार्थ माविबाट २०७९ सालको एसईई परीक्षामा ए प्लस ल्याइ र उत्कृष्ट भएका विद्यार्थीहरुलाई विद्यालय र २ नम्बर वडा कार्यालयले पुरस्कृत र सम्मान गरेको छ । मंगलवार विद्यालयमा एक कार्यक्रमको आयोजना गर्दै संयुक्त रुपमा वडा कार्यालय र विद्यालयले विद्यार्थीलाई पुरस्कृत गरेको हो ।
वडा कार्यालयले जिपीए ए प्लस ल्याउने विद्यार्थीलाई नगद १० हजार र विद्यालयले ५ हजार र ए ल्याउनेलाई प्रशंसापत्रले सम्मान गरेको हो । परीक्षामा सहभागी १८५ जना विद्यार्थीमध्ये ए प्लस ल्याउने ९ जना, ए ल्याउने २२ जना, बी प्लस ल्याउने ३२ जना, बी ल्याउने ४८ जना, सी ल्याउने ४६ जना र सी प्लस ल्याउने २८ जना रहेको विद्यालयले जनाएको छ । 
विद्यालय व्यवस्थापन समितिका अध्यक्ष बलराम घिमिरेको अध्यक्षतामा भएको कार्यक्रममा शिक्षा विकास समन्वय इकाई मकवानपुरका प्रमुख दिनानाथ गौतमको प्रमुख आतिथ्यता र वडा नम्बर २ का वडाध्यक्ष बिष्णु गोपाल मर्हजनको विशेष आतिथ्यता रहेको थियो । 
कार्यक्रममा बोल्दै प्रमुख अतिथि गौतमले जिल्लाकै उत्कृष्ट मानिएको विद्यालयको नतिजाले सबैलाई खुशि तुल्याएको बताए । उनले शिक्षक र विद्यार्थीको सहकार्यले नतिजा संम्भव रहेको बताए । त्यसैगरी कार्यक्रममा बोल्दै वडाध्यक्ष मर्हजनले २०८०को एसइइ नतिजामा ए प्लस हासिल गर्नेलाई नगद १५ हजारले सम्मान गर्ने उदघोषण गरका थिए ।  
सम्मान कार्यक्रममा विद्यालयका प्रअ मोहन प्रसाद शर्मा ,हेटौंडा  २  नम्बर वडा सदस्य सुरज बतौँला,विद्यालय व्यवस्थापन समितिका सदस्यहरु रामचन्द्र बतौँला, ज्ञानु महरा, सरिता दाहाल, लक्ष्मि श्रेष्ठ, पिटिए अध्यक्ष भिम कुमार श्रेष्ठ लगायतको आतिथ्यता थियो ।