प्रदेशस्तरीय यौन तथा प्रजनन स्वास्थ्य अधिकार प्राविधिक कार्यगत समूह बैठक सम्पन्न

३१ असार, काठमाडौैं । स्वास्थ्य निर्देशनालय हेटौंडाको आयोजनामा प्रदेशस्तरीय यौन तथा प्रजनन स्वास्थ्य अधिकार प्राविधिक कार्यगत समूह बैठक हेटौंडामा आइतबार सम्पन्न भएको छ ।
स्वास्थ्य निर्देशनालय हेटौंडाका प्रमुख महेश्वर श्रेष्ठको अध्यक्षतामा भएको बैठकमा निर्देशनालयका बरिष्ठ जनस्वास्थ्य प्रशासक सतिश विष्टले २०७९ चैत १९ गते भएका बैठक र यसबीचमा भएका प्रगति लगायतको बारेमा जानकारी दिएका थिए ।
स्वास्थ्य मन्त्रालयका महाशाखा प्रमुख दिपक तिवारीले मन्त्रालयले स्वास्थ्य क्षेत्रका पुराना कार्यक्रमलाई निरन्तरता दिंदै थप नयाँ कार्यक्रम अघि सारेको बताए । उनले प्रसुति समस्या पर्ने महिलाहरूलाई आकस्मिक एयर एम्बुलेन्स सेवा दिनका लागि कार्यविधि तयार हुँदै गरेकाले यसवर्ष पनि यो सेवा निरन्तरता रहने बताए ।
बैठकमा स्वास्थ्य आपूर्ति केन्द्रका प्रमुख वसन्त अधिकारीले प्रजनन र सुरक्षित महिला स्वास्थ्यसम्बन्धी औषधीको अवस्थाबारे जानकारी दिए । विश्व स्वास्थ्य संगठनका हरि भुसाल सुरक्षित गर्भपतनबारे सचेतना अभिबृद्धीमा जोड दिनुपर्ने बताए ।
कार्यक्रममा स्वास्थ्य मन्त्रालय र निर्देशनालयका प्रतिनिधि, हेटौंडा अस्पतालका निमित्त मेडिकल सुपरिटेन्डेन्ट डा. रामचन्द्र काफ्ले, हेटौंडा उपमहानगरपालिका स्वास्थ्य निरीक्षक भोलाप्रसाद चौलागाईं, हेटौंडा अस्पताल, संचारकर्मी, विभिन्न सामाजिक संस्था, महिला स्वास्थ्य स्वयंसेविका, आमा समूह, औषधि व्यवसायी लगायतको प्रतिनिधिहरूको उपस्थिति रहेको थियो ।