मकवानपुर सहित देशका विभिन्न स्थानमा भारी बर्षा

९ साउन,हेटौँडा । सोमबार बिहान देखि बागमती प्रदेशको राजधानी हेटौँडा र मकवानपुर सहित देशका विभिन्न स्थानमा भारी बर्षा भइरहेको छ । मनसुनको न्यून चापीय रेखा सरदर स्थानको दक्षिणतिर अवस्थित रहेको अवस्थामा मकवानपुर सहित देशका विभिन्न स्थानमा भारी बर्षा भइरहेको छ।बाढी पूर्वानुमान महाशाखाले नवलपरासीको, देउराली,चितवन,दाङ लगायत  आसपासको क्षेत्रमा पछिल्लो ३ घण्टामा भारी वर्षा मापन भएको जनाएको छ । 
महाशाखाले बुटवल र पाल्पामा भएर बगेको तिनाउ नदीले जल सतह पार गरेको,तिनाउ नदीका तटीय क्षेत्र र आसपास डुबान हुन सक्ने भएकाले होचा स्थानमा हुनेहरू दिउँसो १२ बजेसम्म सुरक्षित स्थानमा रहन पनि निर्देशन दिएको छ ।
त्यसैगरी दाङको सुखबारेमा भारी वर्षा मापन भएको छ । त्यहाँ पछिल्लो ३ घन्टामा ५७.२ र पछिल्लो ६ घन्टामा १०५.२ मिलिमिटर वर्षा मापन गरिएको छ । यता पाल्पाको बल्याङगडीमा भारी वर्षा भएको छ। त्यहाँ पछिल्लो ३ घन्टामा ७५, ६ घन्टामा १८७.४ र १२ घन्टामा २४१.२ मिलिमिटर वर्षा मापन गरिएको छ । नवलपुरको देउराली स्टेसनमा पछिल्लो ६ घन्टामा १२९.४ मिलिमिटर वर्षा मापन भएको छ । यता चितवनको भरतपुर विमानस्थल आसपासका क्षेत्रमा पनि पछिल्लो ६ घन्टामा १२६.४ मिलिमिटर वर्षा मापन गरिएको छ । यो समाचार तयार पार्दासम्म मकवानपुरको सबै स्थानमा बर्षा भइरहेको छ ।