१६ गते लगत्तै हेटौँडामा डोजर चल्छः सडक डिभिजन कार्यालय

१० साउन,हेटौँडा ।प्रथम पटक प्रकाशित सूचना अनुसार को ३५ दिनपछी सक्किए लगत्तै हेटौंडा बजार क्षेत्रको सडक विस्तारका लागि हेटौँडामा डोजर चल्ने भएको छ । डिभिजन सडक कार्यालय हेटौंडाले बजार क्षेत्रको सडक विस्तारका लागि प्रथम पटक प्रकाशित सूचना अनुसारको ३५ दिनपछी सक्किए लगत्तै डोजर चल्ने बताएको हो ।

डिभिजन सडक कार्यालयका सुचना अधिकारी इन्जिनियर यादव सुवेदीले प्रष्ट खबरसंग कुरा गर्दै ३५ दिनपछी तोकिएको सडक सीमाभित्रका संरचना नहटाए डोजर चलाएर हटाउन सुरु गरिने बताए । हेटौंडाका केही घरधनीको हकमा सोमबार सर्वोच्च अदालतले अल्पकालीन अन्तरिम आदेश जारी गरेको छ त ? उसो भए विस्तार कार्य रोकिन्छ त? भन्ने प्रश्नमा सुवेदीले विजयलाल जोशीले पेस गरेको रिट निवेदन माथि सर्वोच्च अदालतले उक्त अल्पकालीन अन्तरिम आदेश गरेको हो, सर्वोच्च २ जना घरधनीका लागि अल्पकालीन आदेश दिएको बताए । उनले मुद्दामा न्यायाधीश अनिल कुमार सिन्हाको इजलासले सडक विस्तारको विषयमा १५ दिन भित्र लिखित जवाफ माग गर्दै छलफलको लागि बोलाएको तर रोक्न नभनेको कुरा उल्लेख गरे । 
“मुद्दा परेर आदेश भएका घरको हकमा हामी अदालतकै आदेशाको पालना गर्छै तर अन्य संरचनाको हकमा भने प्रकाशित सूचना भित्र संरचना नहटाएको पाइएमा डोजर चल्ने र यस पटक पक्कै संरचना हटाइनेछ ” – सुवेदीले भने । 
डिभिजन सडक कार्यालय हेटौंडाले असार १० गते महेन्द्र राजमार्गको हेटौंडा–१५  रातोमाटेबाट –बुद्धचोक हुदै राप्तीपुलसम्मको सडक सीमा सड़क केन्द्रबाट २५÷२५ गजभित्र पर्ने संरचना हटाउन  सुचना प्रकाशित गरेको थियो । सडक कार्यालयको ३५ दिने सुचनामा यहि साउन १५ गते सकिदैछ  ।