हेटौंडाको सडक विस्तार कार्य नरोक्न बाबुछोरा नै अनसनमा

१० साउन, हेटौंडा । हेटौंडामा सडक विस्तारको काममा यस पटक खुट्टा कमाउन नहुने भन्दै ७३ बर्षीय एक वृद्ध र उनका ३४ बर्षीय छोरा सडक डिभिजन कार्यलय हेटौंडाको गेटमा अनसन बसेका छन् ।
हेटौंडा उपमहानरपालिका-८ कमानेका ३४ बर्षीय राजिव तामाङ र उनका पिता ७३ बर्षीय मानबहादुर तामाङ अब कुनैपनि बहानमा सडक विस्ताको काम रोक्न नहुने भन्दै कार्यलयको गेटमा अनसन बसेका छन् । उनीहरुले सडक विस्तारले समग्र देशकै विकास गर्ने भएकाले यसलाई रोक्न नहुने भन्दै यहि साउन १ गतेदेखि अनसन बसिरहेका छन् । 
अनसन बसिरहेका राजिवले सरकारले कमभन्दा कम क्षति हुनेगरि सडक विस्तारको उपाय खोज्नुपर्ने बताए । उनले हेटौंडा १५ देखि राप्तिपुलसम्मको क्षेत्रमा पर्ने सरकारी जग्गाहरुको उपयाग गर्दै सडक विस्तार गरे कम क्षति हुने भएकाले सोहि अनुसार गर्नुपर्ने बताए । मानबहादुरले विस्तार कार्यमा आफुहरुको कुनै स्वार्थ नभएको तर यो अस्ताउने उमेरमा समग्र हेटौंडाको विकास बर्षौदेखिको अन्यौलताले निकास पाएको हेर्न चाहेको बताए । सडक डिभिजन कार्यलय हेटौंडाको गेटमा अनसन बसिरहेका उनीहरुले सबैको समर्थनको पर्खाइमा रहेको बताए ।
डभिजन सडक कार्यालय हेटौंडाले असार १० गते महेन्द्र राजमार्गको हेटौंडा–१५  रातोमाटेबाट-बुद्धचोक हुदै राप्तीपुलसम्मको सडक सीमा सड़क केन्द्रबाट २५/२५ गजभित्र पर्ने संरचना हटाउन  सुचना प्रकाशित गरेको थियो । सडक कार्यालयको ३५ दिने सुचनामा यहि साउन १५ गते सकिदैछ  । यही अवधीमा रातोमाटे क्षेत्रमा संरचनाहरू भत्काउने काम भएको छ ।