क्यान्सरको रोकथाममा हातेमालो आवश्यक

२९ मंसिर, हेटौँडा । क्यान्सर रोगबारे सचेतना अभिबृद्धि गर्न सबैको हातेमालो आवश्यक रहेको शुक्रबार हेटौँडामा आयोजित एक कार्यक्रमका वक्ताहरुले जोड दिएका छन् । 
नेपाल अर्वुद्ध रोग निर्वारण संस्थाको १६ औं बार्षिक साधारण सभामा बोल्दै हेटौँडा उपमहानगरपालिकाका प्रमुख हरिबहादुर महतले अहिले क्यासरका कारण जीवन गुमाउनेको संख्या बढिरहेको भन्दै रोग लाग्नै नदिन सचेतना अभिबृद्धिको काम गर्नु जरुरी रहेको बताए । उनले संस्थाले गरिरहेको कामको प्रशंसा गर्दै यसका लागि आवश्यक सहयोग उपमहानगरपालिकाले गर्ने प्रतिवद्धता समेत व्यक्त गरे । कार्यक्रममा संस्थाका केन्द्र्र्रीय उप–कोषाध्यक्ष प्रकाश खतिवडाले अर्वुद्ध रोग निवारण संस्थाले क्यासरबाट हुने जोखिम, लाग्न नदिन अपनाउनुपर्ने सावधानी लगायतको बारेमा जानकारी गराईरहेको बताउँदै समाजका हरेक क्षेत्रले यसबारे चनाखो हुनुपर्नेमा जोड दिए । 
संस्थाका अध्यक्ष कपिला जोशीको सभापतित्वमा भएको कार्यक्रममा संस्थाका मध्यमाञ्चल क्षेत्रीय संयोजक गणेश कोइराला, हेटौँडा अस्पतालका अध्यक्ष रमेश गिरी, संस्थाका उपसभापति भीमप्र्रसाद तिमल्सिना लगायतले मन्तव्य व्यक्त गरेका थिए । कार्यक्रममा सचिव शंकरमान श्रेष्ठले बार्षिक प्रतिवेदन प्रस्तुत गरेका थिए ।