प्याव्सन मकवानपुरद्वारा १७१ विद्यार्थी सम्मानित 

१२ साउन, हेटौंडा । २०७९ सालको एसइई परीक्षामा उत्कृष्ट अङ्क ल्याउन सफल मकवानपुरका संस्थागत विद्यालयका १७१ जना विद्यार्थीलाई प्याव्सन मकवानपुरलेसम्मानपत्र प्रदान गरेको छ ।
बिहीबार एक कार्यक्रमकाबीच २०७९ सालको परीक्षामा ३ दशमलव ६० वा सो भन्दा बढी जिपिए ल्याएका मकवानपुरका २७ संस्थागत विद्यालयका १७१ जना विद्यार्थीलाई सम्मान गरिएको हो । एसइईमा ४ जीपिए ल्याएर जिल्ला प्रथम भएकी डाफिन राइका मगरलाई नगदसहित प्रमाणपत्र प्रदान गरिएको छ । 
प्याव्सन मकवानपुरका अध्यक्ष बिनोद सुवेदीको अध्यक्षतामा भएको कार्यक्रममा हेटौंडा उपमहानगरपालिका मेयर मीनाकुमारी लामाको प्रमुख आतिथ्यता थियो ।
मेयर लामाले अहिलेको शिक्षा प्रणालीले बेरोजगारको संख्या बढाउँदै लगेका भन्दै नगरमा इन्जिनियरिङ, कृषि र कानून विषयको शिक्षा सञ्चालनको पक्षमा रहेको जानकारी दिइन् । 
अध्यापनमा आउने समस्या हटाउनका लागि उपमहानगरपालिकाको ढोका सधै खुला रहेको भन्दै उनले निजी क्षेत्रले शिक्षामा गरेको ठूलो लगानीले संस्थागत विद्यालयबाट राम्रा जनशक्ति उत्पादन भएको बताइन् । 
कार्यक्रममा राष्ट्रिय परीक्षा बोर्ड हेटौंडाका प्रमुख कृष्णप्रसाद घिमिरे, शिक्षा विकास तथा समन्वय इकाइका प्रमुख दिनानाथ गौतम, प्याव्सन बागमती प्रदेश अध्यक्ष केशवलाल श्रेष्ठ, प्याव्सन नगर अध्यक्ष रामकुमार श्रेष्ठ, संस्थागत विद्यालय अभिभावक संघ अध्यक्ष रमिला सापकोटा लगायतको उपस्थिति रहेको थियो ।