हेटौंडा-६ को रक्षादेवी टोललाई हेटौँडाको नमुना टोल बनाईने

१३ साउन, हेटौडा । हेटौडा–६ मा रहेको रक्षोदेवी टोल विकास संस्थालाई हेटौँडाकै नमुना टोल बनाईने भएको छ ।  शनिवार हेटौडा–६ चौघडामा रहेको रानी सामुदायिक वनको सभाहलमा भएको कार्यक्रममा रक्षादेवी टोललाई नमुना टोल बनाउने प्रतिवद्धता पत्रमा हस्ताक्षर गरिएको छ । 

नवजीवन ज्योति क्लबका अध्यक्ष राजकुमार बास्तोला र रक्षादेवी टोल विकास संस्थाका अध्यक्ष रमेश कुमार बानियाँले हस्ताक्षर गरेका हुन् ।  प्रतिवद्धता पत्रमा हस्ताक्षर कार्यक्रममा हेटौडा उपमहानगरपालिका प्रमुख मीना कुमारी लामाको प्रमुख आतिथ्यता रहेको थियो । उनले रक्षादेवी टोललाई नमुना टोल बनाउन सहयोग गरिने बताइन । लामाले राम्रो कामको लागि उपमहानगरपालिका सदैव सहयोग गर्न तैयार रहेको उदघोष गरिन । कार्यक्रममा नमुना टोलले गर्नु पर्ने कार्यहरुको बारेमा विके महर्जनले सहजीकरण गर्नु भएको थियो । कार्यक्रममा क्लवका पूर्व अध्यक्ष एवं सल्लाहकार श्यामप्रसाद श्रेष्ठले नमूना टोलको अवधारणा र लक्ष्य हासिल गर्ने कार्ययोजनाबारे जानकारी गराएका थिए । नवजीवन ज्योति क्लबका अध्यक्ष राजकुमार बास्तोलाको सभाध्यक्षतामा भएको कार्यक्रममा हेटौडा–६ का कार्यवाहक वडा अध्यक्ष विजय पौडेल, वडा सदस्य लेखराज ढकाल, भूमि आयोग मकवानपुरका विज्ञ सदस्य अर्जुन प्रसाद चौलागाई, सामुदायिक वन उपभोक्ता महासंघ, मकवानपुरका अध्यक्ष साधुराम चौलागाई, टोल विकास संस्था नगर समन्वय समितिका अध्यक्ष ध्रुव अधिकारी, जनकल्याण सहकारीका अध्यक्ष हिमाल पौडल, नवजीवन ज्योति क्लवका निवर्तमान अध्यक्ष श्रीराम पुडासैनी, रानी सामुदायिक वनका उपाध्यक्ष केशव धिताल, सञ्चारकर्मी, टोल विकास संस्थाका पदाधिकारी, स्थानीय लगायतको सहभागिता थियो । २०८१ साल जेठ २२ गते विश्व वातावरण दिवसको दिन रक्षादेवी टोललाई नमुना टोल को रुपमा घोषणा गरिने भएको छ ।