बाराको जितपुरसिमरामा  हतकडी सहित स्थानीयले भगाए अभियुक्तलाई

१६ साउन,निजगढ । बारामा प्रहरीले पक्राउ गरेको एकजना अभियुक्तलाई हतकडी सहित स्थानीयले  भगाएका छन् । बाराको जितपुरसिमरा उपमहानगरपालिका वडा नम्बर १६ टाँगिया बस्तीका बासिन्दाले भरुवा बन्दूक सहित पक्राउ परेका ३५ वर्षीय सागर लामालाई स्थानीयले घेरा हालि प्रहरी माथि आक्रमण गरि भगाएका हुन् । 
जितपुरसिमरा–१६ टाँगिया बस्तीमा हातहतियार र ओखेटोपहार सहित केही व्यक्ति लुकेको  भन्ने सूचना आएपछि मंगलबार बिहान इलाका प्रहरी कार्यालय निजगढका प्रहरी निरीक्षक घनश्याम श्रेष्ठ नेतृत्वको १५ जनाको प्रहरी टोलीले हतियार सहित लामालाई पक्राउ गरेको थियो ।  हतियार सहित पक्राउ परेका उनलाई प्रहरी कार्यालय लैजादै गरेको अवस्थामा करिब २०० जनाको संख्यामा रहेका स्थानीयले घेरा हालि प्रहरी माथि आक्रमण गरि भगाएको बारा प्रहरीले जनाएको छ । स्थानीयले प्रहरीलाई आक्रमण गरेपछि प्रहरीले स्थिति नियन्त्रणमा लिन पाँच राउन्ड हवाई फायर समेत गरेको थियो । आक्रमणमा परी वरिष्ठ प्रहरी नायब निरीक्षक पदमबहादुर शाही र प्रहरी सहायक निरीक्षक बलराम गिरी घाइते भएका छन्। निजगढ अस्पतालमा उपचाररत उनीहरूको अवस्था सामान्य रहेको बाराका प्रमुख प्रहरी उपरीक्षक होबिन्द्र बोगटीले जनाएका छन् । “अभियुक्तलाई हतकडी सहित भगाउने काम भएको छ, घटनामा संलग्नको पहिचान भइसकेको छ , हामी खोज्दै छौ ।”– उपरीक्षक बोगटीले भने ।