स्वतन्त्र पार्टीले संचालनमा ल्याएको एम्बुलेन्स कलेजलाई नै फिर्ता

२१ साउन,हेटौँडा । ६५ वर्षभन्दा माथिका वृद्धवृद्धालाई स्वास्थ्य उपचार गर्ने भनेर राष्ट्रिय स्वतन्त्र पार्टी (रास्वपा) ले केही दिन अघिबाट चितवनमा सञ्चालनमा ल्याएको एम्बुलेन्स पुरानो मेडिकल कलेज भरतपुरलाई नै फिर्ता गरेको छ ।
रास्वपा सभापति रवि लामिछाने चितवन क्षेत्र नम्बर २ बाट निर्वाचित भएको एक सय दिन पुगेको अवसरमा रङ्नै परिवर्तन गरेर ना २ ख ५६१९ नम्बरको एम्बुलेन्सलाई ६५ वर्षभन्दा माथिका वृद्धवृद्धालाई स्वास्थ्य उपचार गर्ने भनेर निशुल्क  रुपमा साउन १७ संचालनमा ल्याइएको थियो । भारतीय दूतावासले उक्त एम्बुलेन्स आजभन्दा ११ वर्ष अगाडि पुरानो मेडिकल कलेजलाई दिएको थियो । लामो समयदेखि नवीकरणसमेत नगरिएको उक्त एम्बुलेन्स गत साउन १४ गते जरिवाना तिरेर नवीकरण गरी मोबाइल क्लिनिको रुपमा सन्चालमा ल्याएको घोषणा गरिएको थियो । राष्ट्रिय स्वतन्त्र पार्टीले गैरकानूनी रुपमा रंग परिवर्तन गरेको र ‘एम्बुलेन्स’ लेखेको मेटाएर ‘मोबाइल क्लिनिक’ लेखेको भन्दै सो कदम विवादमा परेको थियो । विवाद पछि एम्बुलेन्स पुरानो मेडिकल कलेजलाई नै फिर्ता गरिएको राष्ट्रिय स्वतन्त्र पार्टी बागमती स्वास्थ्य तथा जनसंख्या विभागका प्रमुख डाक्टर मनोहर प्रधानल बताएका छन् । उनले अर्को भ्यानको व्यवस्था गरेर मोबाइल क्लिनिकको रुपमा चलाउने तयारी रास्वपाले गरेको समेत बताएका छन् ।