बागमती पहिरोःवेपत्ताको खोजि कार्य मंगलबारका लागी स्थगित

२३ साउन,हेटौँडा । मंगलबार बिहान मकवानपुरको बागमती–५ सिक्रे दोभानमा पहिरोमा परी वेपत्ता भएका पाँचजनाको खोजी कार्य मंगलबारका लागी स्थगित गरिएको मकवानपुरका प्रहरी प्रवक्ता डिएसपी टेकबहादुर कार्कीले जानकारी दिएका छन् ।
घटनास्थल दुर्गम स्थानमा रहेको, सडक मार्ग अप्ठेर रहेको र भेल आउन सक्ने र रातको समयमा खोजि तथा उद्धार कार्य कठिन हुने भएकाले खोजि कार्य आजलाई रोक्नुपरेको प्रवक्ता कार्कीले बताएका छन् । रातको समयमा खोजिकार्यका लागी प्रहरीसँग पर्याप्त सामाग्री नभएको र प्रहरी पनि सिमित र असुरक्षित हुने भएकाले खोजि कार्य स्थगित गरिएको जनाएका हुन् । “बुधबार बिहानैबाट आवश्यक तयारी र थप टोली सहित पहिरोमा वेपत्ता भएकाको खोजि कार्यलाई निरन्तरता दिनेछौँ– डिएसपी कार्कीले भने । 

खोजि कार्यमा जिल्ला प्रहरी कार्यलय, इलाका प्रहरी कार्यलय फापरवारी,प्रहरी चौकी भोर्लेनी र झुरझुरेबाट प्रहरी निरीक्षकको कमाण्डमा करिब ३५ जना जनशक्ति परिचालन गरिएको जनाइएको छ । उक्त पहिरोमा बेपत्ता भएका ६ जना मध्ये सिन्धुली हरिहरपुर–१ कोकटीका बस्ने १७ बर्षीय पासाङ घिसिङको घाइते अवस्थामा उद्धार गरिएको छ । विहानदेखि हराइरहेका उनलाई अपरान्ह घटनास्थलदेखि ६÷७ किलोमिटर तल बगेरीस्थित बागमती खोलामा मुढामा तैरिएको अवस्थामा उद्धार गरिएको प्रहरीले जनाएको छ।पहिरोमा परेका ६० बर्षीय अक्कल बहादुर स्यांतान, निजकी छोरी २२ बर्षीय शिला पहरी, शिलाका श्रीमान २५ बर्षीय जिबन पहरी, शिलाकी ४ बर्षीय छोरा मिलन पहरी, डेढ बर्षीया छोरी दिब्या पहरी अझै बेपत्ता रहेका छन् ।पहिरोमा परि उद्धार गरिएकी अक्क्ल बहादुरकी श्रीमती ५५ बर्षीया सन्त माया स्यांतानको उपचारको विहान फापरवारीस्थित स्वास्थ्य संस्थामा मृत्यु भएको थियो ।