मालपोत अधिकृतसहित ६ जनामाथि भ्रष्टाचार मुदा दायर

२५ साउन, बीरगञ्ज । मालपोत कार्यालय बीरगञ्ज मालपोत अधिकृतसहित ६ जनामाथि भ्रष्टाचार मुदा दायर भएको छ ।
बुधबार अख्तियार दुरुपयोग अनुसन्धान आयोगले उनीहरुमाथि विशेष अदालत काठमाडौंमा भ्रष्टाचार मुद्दा दायर गराएको हो ।
भ्रष्टाचार मुद्दा दायर भएकाहरुमा मालपोत कार्यालय, वीरगञ्जका मालपोत अधिकृत हरिनारायण मिश्र, मालपोत अधिकृत सनदकुमार द्विवेदी ब्राह्मण, मालपोत अधिकृत चन्द्रबहादुर भण्डारी, कम्प्युटर अधिकृत कमोद तिवारी, नायब सुब्बा रामेश्वरप्रसाद साह र नायब सुब्बा लेखनाथ भट्टराई छन् ।
अख्तियारले रामेश्वर प्रसाद साहलाई ७ लाख ५१ हजार ८०९ रुपैया ९० पैसा जरिवाना, कमोद तिवारीलाई २३ हजार ४९५ रुपैया ५० पैसा, चन्द्र बहादुर भण्डारीलाई चार लाख ७८ हजार ८०८, लेखनाथ भट्टराईलाई ३९ हजार ५७ रुपैया ५० पैसा, हरिनारायण मिश्रलाई ६१ हजार २४३ रुपैया ७६ पैसा र प्रतिबादी सनद कुमार द्वीवेदी ब्रह्मणलाई दुई लाख २७ जहार ५५६ रुपैया ४० पैसा जरिवाना मागदावी गरेको छ ।
रजिष्ट्रेशन पास गर्दा लिखतहरुमा घरबाटो सिफारिस विना न्यूनतम मूल्याङ्‍कन भन्दा कम मूल्य राखी राजश्व हिनामिना हुने गरी ब्यक्तिगत लाभ लिई लिखत पारित गरेको उजुरीको सम्बन्धमा अनुसन्धान हुँदा राजश्व हिनामिना गरेको पुष्टि भएपछि उनीहरु बिरुद्ध मुदा दायर गराइएको अख्तियारका प्रबक्ता भोला दाहालले जानकारी दिए ।