बिरामी भर्ना निःशुल्क गर्न बागमती स्वास्थ्य मन्त्रालयको निर्देशन

३० साउन, हेटौंडा । बागमती प्रदेशको स्वास्थ्य मन्त्रालयले आफु मातहतका सबै प्रादेशिक अस्पतालहरुमा विरामी भर्ना सेवा निःशुल्क गर्न निर्देशन दिएको छ । मन्त्रालयले एक सूचना जारी गर्दै प्रदेशका १३ वटा प्रादेशिक अस्पतालहरुमा शैयाहरु निःशुल्क उपलब्ध गराउन निर्देशन दिएको मन्त्री उत्तम जोशिले जानकारी दिए । 
उनले यो सेवा भदौ १ गतेबाट लागू हुने पनि जानकारी दिए । मन्त्री जोशिका अनुसार प्रादेशिक अस्पतालका क्याविन, एनआईसियू र आईसियू बाहेक अन्य सम्पूर्ण शैयाहरु निःशुल्क हुने छन् । गत साउन २२ गतेको मन्त्रीस्तरको निर्णय अनुसार मन्त्रालयले साउन २८ गते आइतबार उक्त सूचना जारी गरेको मन्त्री जोशिले बताए । 
निर्णय अनुसार प्रदेशका १३ जिल्लाका १३ प्रादेशिक अस्पतालका ८११ वटा शैया नागरिकहरुका लागि निःशुल्क उपलब्ध हुने भएको छ । मन्त्री जोशीले अस्पतालमा विरामी भर्ना बाहेकका अन्य शुल्क भने सरकारले तोके अनुसारकै शुल्क लाग्ने छ । 
यस्तै मन्त्रालयले भदौ १ गतेदेखि लागू हुने गरी प्रदेशभित्रका १३ वटा आयुर्वेद केन्द्रलाई पनि रिह्यावीटेसन सेवा र फिजियोथेरापी सेवा निःशुल्क गर्न निर्देशन गरिएको छ । मन्त्रालयले प्रदेशका सरकारी, निजी, सहकारी र सामुदायिक अस्पतालहरुलाई पनि सामाजिक सेवा ईकाई स्थापना गरी विपन्न, असाहय विरामीहरुको उपचारको व्यवस्थापन गर्न निर्देशन दिएको छ । 
यसअघि मन्त्रालयले साउन ४ गते एक सूचना जारी गर्दै निजी, सहकारी र सामुदायिक अस्पतालहरुलाई कुल शैयाको १० प्रतिशत निशुल्क गर्न निर्देशन दिएको थियो ।