शिक्षा विधेयकमा सुझाव सहित विव्यस महासंघको ध्यानाकर्षण

३० साउन, हेटौंडा । सामुदायिक विद्यालय व्यवस्थापन समिति महासंघले प्रतिनिधिसभामा पेश भएको विद्यालय शिक्षा विधेयकमा ५ बुँदे सुझाव सहित सोमबार हेटौंडामा ध्यानाकर्षण पत्र बुझाएको छ ।
महासंघले देशव्यापीरुपमा प्रमुख जिल्ला अधिकारी र शिक्षा विकास तथा समन्वय इकाईका प्रमुखमार्फत संघीय सरकारको शिक्षामन्त्रीलाई ज्ञापनपत्र बुझाउँदै आफ्नो तर्फबाट ५ बुँदे सुझाव पेश गरेको हो । 
सोमबार हेटौंडामा महासंघका सचिव मोहमद समीमको नेतृत्वमा मकवानपुरका प्रमुख जिल्ला अधिकारी सूर्यप्रसाद सेढाई र शिक्षा विकास तथा समन्वय इकाई मकवानपुरका प्रमुख दीनानाथ गौतमलाई ध्यानाकर्षण पत्र बुझाएको छ ।
सचिव समीमले विधेयकको मस्यौदामा विद्यालय व्यवस्थापन समिति सम्बन्धी व्यवस्था त्रुटीपूर्ण रहेको, विद्यालय संचालन र व्यवस्थापनमा अभिभावकको कुनै पनि सहभागिता, संलग्नता र भूमिका नरहने भएकाले विद्यालय व्यवस्थापन समिति महासंघको तर्फबाट ध्यानाकर्षण पत्र बुझाएको जानकारी दिए । उनले सरोकारवालासँग छलफल र परामर्श बिना नै विधेयकको मस्यौदा तयार पारिएकोले यसको विरोध गर्दै ध्यानाकर्षण पत्र बुझाउँनुरेको बताए ।
ध्यानाकर्षण पत्रमा समुदायको स्वामित्व र अगुवाइमा सञ्चालन हुने भएकाले संघीय शिक्षा ऐनमा सामुदायिक विद्यालय नै लेख्नुपर्ने, विद्यालय व्यवस्थापन समितिको नेतृत्वमा अभिभावक नै हुनुपर्ने, विद्यालय व्यवस्थापन समितिको पदावधी पाँच वर्षको हुनुपर्ने, विद्यालयको प्रधानाध्यापक छनौट गर्दा विद्यालय व्यवस्थापन समितिको निर्णायक सहभागिता रहने व्यवस्था हुनुपर्ने जस्ता सुझाव सहित महासंघले ध्यानकर्षण पत्र बुझाएको हो ।