४८ हजार पशुलाई लगाइयो लम्पी स्किनविरुद्धको खोप

४ भदौ, हेटौंडा । एक सातामा बागमती प्रदेशका ४८ हजार पशुलाई लम्पी स्किन रोगविरुद्धको खोप लगाइएको छ । प्रदेशको कृषि तथा पशुपन्छी विकास मन्त्रालयले संचनालन गरेको खोप अभियान अन्तर्गत १३ जिल्लाका ४८ हजार ३६४ पशुमा लम्पी स्किनको खोप लगाइएको हो ।
मन्त्रालयले मातहतका भेटेरिनरी अस्पताल तथा पशु विज्ञ केन्द्र मार्फत प्रदेशका ९१ स्थानीय तहमा संचालन गरेको सप्ताहव्यापी खोप अभियान अन्तर्गत ४८ हजार ३६४ गाई भैँसी, गोरु, साँढे, पाडापाडी र बाँच्छाबाच्छीमा रोगविरुद्धको खोप लगाएको हो । 
मन्त्रालयले साउन २५ देखि भदौ १ गतेसम्म संचालन गरेको लम्पी स्किन रोगविरुद्धको खोप अभियानमा सबैभन्दा बढी खोप चितवन र सबैभन्दा कम दोलखा जिल्लाका पशुमा खोप लगाइएको छ । चितवनमा १० हजार २१९ पशुमा लम्पी स्किन रोगविरुद्धको खोप लगाइएको कृषि तथा पशुपन्छी विकास मन्त्रालयका सूचना अधिकारी अनुप अधिकारीले जानकारी दिए । 
उनका अनुसार दोलखाको ५४९, काठमाडौँमा २ हजार ४३९, भक्तपुरमा ९२१, ललितपुरमा १ हजार ५८०, धादिङमा ४ हजार ३०१, सिन्धुलीमा २ हजार ५७८, रामेछापमा २ हजार ३३५ पशुमा लम्पी स्किन रोगविरुद्धको खोप लगाइएको छ । 
यसैगरी सिन्धुपाल्चोकमा ३ हजार २७४, मकवानपुरमा ६ हजार ८२२, काभ्रेमा ८ हजार ४११, नुवाकोटमा ३ हजार ५९७ र रसुवामा एकहजार ३३८ पशुमा लम्पी स्किनको खोप लगाइएको छ । 
मन्त्रालयले सप्ताहव्यापी कार्यक्रम अन्तर्गत साउन ३२ गतेसम्म खोप अभियान सञ्चालन गर्ने भनेपनि प्राकृतिक विपद्का कारण एकदिन थप गरेर भदौ १ गतेसम्म संचालन गरिएको थियो ।