बागमती प्रदेशका मन्त्री चित्रकारले बल्ल पाए मन्त्रालय

५ भदौ, हेटौंडा । विना विभागीय मन्त्री रामकृष्ण चित्रकारलाई मन्त्रालयको जिम्मेवारी दिने बागमती प्रदेश मन्त्री परिषदको निर्णय गरेको छ ।
मंगलबार बसेको मन्त्री परिषद बैठकले चित्रकारलाई उद्योग, बाणिज्य, भूमि तथा प्रशासन मन्त्रालयको जिम्मेवारी दिने निर्णय गरेको हो । मूख्यमन्त्री शालिकराम जम्कट्टेल नेतृत्वको सरकार गठन भएदेखि नै विना विभागीय मन्त्री भएर कामविहिन रहेका उनले बल्ल मन्त्रालय पाएका छन् ।
बैठकले प्रदेश सभाको बैठक भदौ १७ गते १ बजे आव्हान गर्ने निर्णय गरेको छ भने बागमती प्रदेश सरकार (कार्य विभाजन) नियमावली, २०८० स्वीकृत गर्ने निर्णय गरेको छ । “प्रदेश आन्तरिक पर्यटन काज सम्बन्धी मापदण्ड, २०८०" पनि स्वीकृतगरिएको छ । बैठकले सिन्धुपाल्चोकको बलेफी गाउँपालिकाको वडा सङ्ख्या तथा सिमाना हेरफेरका लागि नेपाल सरकारमा पठाउने निर्णय गर्नुका साथै प्रदेश सञ्चार माध्यम व्यवस्थापन ऐन, २०७५ लाई संशोधन गर्न बनेको बिधेयक प्रदेश सभामा पेश गर्न स्वीकृति दिएको छ ।
मन्त्री परिषद बैठकले “प्रदेश स्वास्थ्य सेवा ऐन, २०७५ लाई संशोधन गर्न बनेको विधेयक” प्रदेश सभामा पेश गर्न स्वीकृति प्रदान गर्ने र “ज्यान जोखिममा परेका गर्भवती तथा सुत्केरी महिलाहरुको लागि निःशुल्क हवाई उद्वार सेवा सम्बन्धी कार्यविधि, २०८०" स्वीकृति गर्ने निर्णय गरेको छ ।
बैठकमा प्रदेश सरकारी कामकाजको भाषा सम्बन्धमा व्यवस्था गर्न बनेको विधेयक प्रदेश सभामा पेश गर्न स्वीकृति प्रदान गर्ने, प्रदेश कृषि विकास सम्बन्धमा व्यवस्था गर्न बनेको बिधेयक प्रदेश सभामा पेश गर्न स्वीकृति प्रदान गर्ने, प्रदेश विपद् व्यवस्थापन परिचालन कोष कार्यविधि स्वीकृत गर्ने र विज्ञान, प्रविधि, नवप्रवर्तन तथा विकास कोष सञ्चालन विधेयक प्रदेश सभामा पेश गर्ने स्वीकृति दिने निर्णय गरेको छ ।