चुरियामाई बस दुर्घटनाः मृतक सबैको सनाखत, प्रजिअ र एसपीको टोली अस्पतालमा 

फोटोःपत्रकार प्रतिक्षा न्यौपाने

७ भदौ, हेटौंडा । बिहिबार बिहान पुर्व पश्चिम लोकमार्ग अन्र्तगत मकवानपुर र बाराको सिमाना पर्ने बाराको जीतपुरसिमरा उपमहानगरपालिका-२२ चुरियामाईमा तीर्थ यात्री बोकेको बस दुर्घटनामा मृत्यु भएका ७ जनाको शनाखत भएको छ भने घाइते सबैको परिचय खुलेको छ । 
बस दुर्घटनामा मृत्यु हुनेमा ६ भारतीय नागरिक र एकजना नेपाली रहेको इलाका प्रहरी कार्यालय सिमराका प्रहरी नायब उपरीक्षक प्रदीपबहादुर क्षेत्रीले जानकारी दिएका छन् । मृतक चार महिला र तीन पुरूषको सनाखत भएको छैन । दुर्घटनामा १८ जना घाइते भएका छन् । घाइते मध्ये एकजनाको हेटौंडा–११ मा रहेको चुरेहिल अस्पताल र बाँकी १७ को हेटौंडा अस्पतालमा उपचार भइरहेको छ । काठमाडौंबाट महोत्तरीको लोहारपट्टी जाँदै गरेको मधेस प्रदेश–०३–००१ ख ७९९४ नम्बरको बस बिहिबार  बिहान दुर्घटना भएको हो । बस चुरियामाई मन्दिर नजिक ओरालेको खोलामा खसेको थियो । दुर्घटनापछि फरार रहेका चालक सहित ३ जनालाई धनुषाबाट प्रहरीले पक्राउ गरिसकेको छ । 
दुर्घटनामा मृत्यु हुनेहरूमा भारत राजस्थान बस्ने वर्ष ६७ का बहादुर सिंह, सोही स्थान बस्ने वर्ष ६० की सत्यवती, वर्ष ७० को राजेन्द्र चतुरबेदी, वर्ष ६५ की श्रीकान्त चतुरबेदी, वर्ष ६७ की बैजन्ती देवी, वर्ष ६५ की मिरा देवी, महोत्तरी लोहारपटी–५ बस्ने वर्ष ४१ को विजय लाल रहेका छन् । 
घाइते हुनेमा भारत राजस्थान बस्ने वर्ष ४८ को घनश्याम चतुरबेदी, वर्ष ५३ की माया देवी, वर्ष ३५ को अनिल कुमार, वर्ष ५० को तारा वती चतुरबेदी, वर्ष ९ की क्रितिका चतुरबेदी, वर्ष ४८ को श्याम लाल माली, वर्ष ४७ को हरवारी माली, वर्ष ७० की चौथी देवी, वर्ष ७२ को सुरेस चन्द्र चक्रवती, वर्ष ६३ को धरम सिंह, वर्ष ६० की ईन्दु धाकद, वर्ष १६ की गर्बिदा चतुरबेदी, वर्ष ५४ को राम कुमार चतुरबेदी, वर्ष ७३ को राम प्रसाद पि, महोत्तरी लोहारपति–५ बस्ने वर्ष २६ को जसबेन्दर पासवान, नेपालको धनुषा मौवा गाउँपालिका–१८ जनकपुर बस्ने वर्ष ४१ को घुरन मण्डल, महोत्तरी जलेश्वर नगरपालिका बस्ने वर्ष ३८ को बिहारी मुखिया रहेका छन् ।
घाइतेको अवस्था बुझ्न बाराका प्रजिअ नवराज सापकोटा, मकवानपुरका प्रजिअ सूर्य प्रसाद सेढाई, मकवानपुरका प्रहरी प्रमुख एसपी सिताराम रिजाल, बाराका प्रहरी प्रमुख एसपी होबिन्द्र बोगटीसहितको टोली घाइतेको उपचार भइरहेको चुरेहिल र हेटौँडा अस्पताल पुगेका छन् । घाइतेहरुको उपचारमा कुनै कमी नगर्न अस्पताल प्रशासनलाई आग्रह गरेको मकवानपुरका प्रजिअ सूर्य प्रसाद सेढाईले बताए ।