रिद्धिसिद्धि ‘स्मार्ट स्टुडेन्ट अफ द इएर’का उत्कृष्ट इशान्त सहित ११ जना पुरस्कृत

९ भदौ, हेटौँडा । रिद्धिसिद्धि सिमेन्टलको आयोजनामा भएको ‘स्मार्ट स्टुडेन्ट अफ द इएर २०८०’ का उत्कृष्ट विधार्थीहरुलाई शनिवार एक कार्यक्रमको आयोजना गरी पुरस्कृत एवं सम्मानित गरेको छ ।
उद्योग परिसरमा आयोजना गरिएको कार्यक्रममा उद्योगको छात्रवृत्ति कार्यक्रम अन्तर्गत यहि साउन २७ गते सम्पन्न परीक्षाबाट उत्कृष्ट हुन सफल ११ जना विद्यार्थीहरुलाई पुरस्कृत एवं सम्मान गरिएको हो । यस्तै कार्यक्रममा उत्कृष्ट विद्यार्थी सँगै उनीहरुले एसईई उतिर्ण गरेको विद्यालयलाई सम्मेत सम्मान गरिएको छ । 
रोबोटिक ल्याबमा बनेको स्मार्ट छात्रवृत्ति कार्यक्रमअन्तर्गत हेटौंडा २ मा रहेको ज्ञानोदय बाल बाटिका एकेडेमीका इशान्त कुमार मिश्र प्रथम भएका थिए । उनले पुरस्कार स्वरुप छात्रावृत्तिका लागी प्रत्येक महिना ५ हजारका दरले १२ महिनामा ६० हजार रुपैयाँ पाएका छन् ।
यस्तै द्वितिय भएका श्री आधुनीक राष्ट्रिय माविकी अंशु कुमारी र त्रितिय भएका बालजागृती इङ्गलिस स्कुलका रिजन कठायतले क्रमशः मासिक पाँच हजार, ३५ सय र २५ सय तथा सान्त्वना भएका थप आठजना विद्यार्थीले मासिक १५ सय रुपैयाँका दरले छात्राबृत्ति पाउँने भएका छन् ।
उद्योगका प्लान्ट डिभिजन प्रमुख रेवतीराम ढकाल र जेनरल म्यानेजर कैलाश कुमार चौहानले उत्कृष्ट विद्यार्थी र विद्यालयका प्रतिनिधिहरुलाई पुरस्कार तथा सम्मान पत्र प्रदान गरेका थिए । उक्त अवसरमा प्लान्ट डिभिजन प्रमुख ढकालले अहिले उत्कृष्ट भएका ११ जना बिद्यार्थीहरुमध्येबाट कक्षा १२ को परीक्षमा गरेको प्रदर्शनको आधारमा उत्कृष्ट जिपिए ल्याउँने एकजनालाई ल्यापटप प्रदान गरिने घोषणा पनि गरे ।
पुरस्कार वितरण कार्यक्रममा उद्योगका तर्फबाट गुरुप्रसाद घिमिरे, होमनाथ लामिछाने, रामप्रसाद अधिकारी, सुजन श्रेष्ठ, श्री आधुनीक राष्ट्रिय माविका प्रधानाध्यापक रामसागर गुरागाईँ, ज्ञानोदय बालबाटिका एकेडेमीका सञ्चालक संजय सुवेदी लगाएत पुरस्कृत विद्यार्थी र अभिभावकहरुको उपस्थिति रहेको थियो ।
एक सय नौ विद्यार्थी सहभागी भएको रोबोटिक ल्याबमा बनेको छात्रवृत्ति कार्यक्रममा एसइई परीक्षामा उपलब्ध अंक, दौड प्रतियोगिता साथै आइक्यु परीक्षामा सोधिएका सम्पूर्ण अंक जोडेर छात्रवृत्तिका लागि उत्कृष्ट ११ स्मार्ट विद्यार्थी छनोट गरिएको थियो ।