काठमाडौँबाट चोरी गर्न हेटौँडामा, मकवानपुर प्रहरीद्धारा ४ जना सार्वजनिक

चोरीका गरगहना सहित पक्राउ परेकाहरु

१० भदौँ,हेटौँडा । मकवानपुर प्रहरीले हेटौँडाबाट विभिन्न समयमा सुनका गरगहना तथा नगद चोरी गर्ने चारजनालाई पक्राउ गरि सार्वजनिक गरेको छ । मकवानपुर प्रहरीले आइतबार पत्रकार सम्मेलन गर्दे काठमाडौँबाट हेटौँडा आएर नगरमा सुनका गरगहना तथा नगद चोरी गर्ने चारजनालाई सार्वजनिक गरेको हो । 
प्रहरीले चोरीको आरोपमा सिन्धुपाल्चोकका  पाँचपोखरी थाङ्पाल गाउँपालिका वडा ७ बस्ने २८ वर्षका  भीमलाल लामा, सोही स्थान बस्ने २८ वर्षका  प्रदीप तामाङ र २९ वर्षका  आकाश तामाङ रहेका छन् भने चोरीको सुन खरिद गर्ने सोही ठाउँका हाल काठमाडौं कागेश्वरी मनोहरा नगरपालिका वडा नं. ८ स्थितमा रितु सुन पसल सञ्चालन गर्ने ३९ वर्षका राजेन्द्र रसाइलीलाई सार्वजनिक गरेको हो । 
पत्रकार सम्मेलनमा बोल्दै मकवानपुरका एसपी सिताराम रिजालले ४ जनाको समुह २ वटा मोटरसाईकलमा २९ गते काठमाडौबाट हेटौडा आएको दिउँसोको समयमा बन्द रहेको घरहरु हेरेको सोही दिन राती हेटौडा बसपार्कको होटलमा बसेको, ३० गते ११ बजेको समयमा हेटौंडा ९ स्थित सुशिला साउदको घर फोडेर चोरी गरेको  र चोरी पश्चात पथलैया बर्दिवास हुदै ३१ गते काठमाडौं पुगेको अनुसन्धानमा खुलेको बताए ।
घटनाको सुचना आएलगतै मकवानपुरको प्रहरी टिम अनुसन्धनमा जुटेको र एकसाता लामो प्रयास पछि प्रमाण फेला पारेर पक्राउ गरेको एसपी रिजालले जनाए । 
पत्रकार सम्मेलनमा उनले श्रावण ३० गते हेटौंडा ९ स्थित सुशिला साउदको घरबाट अज्ञात समुहले नगद तीस हजार, सुनको सिक्री डेढ तोलाको एक थान, सुनको बाला १ तोलाको १ थान, सुनको चन्द्र हार १ तोलाको १ थान, सुनको टप ४ आनाको १ जोडी, सुनको मुन्द्रा आनाको १ जोडी र घडी एक थान समेत गरी पाँच लाख ३२ हजार बराबरको सुनको गरगहना, नगद रकम चोरी भएको सुचना मकवानपुर प्रहरीलाई प्राप्त भएको बताए । प्रहरीले उनीहरुलाई चोरी गरगहना र गरेको सुन खरिद गर्ने समेतलाई पक्राउ गरेको र  घटनामा संलग्न अर्काे एकजनाको खोजी कार्य भइरहेको जनाइएको छ ।