७१ गाउँपालिकामा न्यायिक सहजकर्ता नियुक्तीको तयारी

१२ भदौ, हेटौंडा । बागमती प्रदेश सरकारले ७१ वटा पालिकामा न्यायिक सहजकर्ता नियुक्तिको तयारी गरेको छ । प्रदेशको आन्तरिक मामिला तथा कानुन मन्त्रालयले प्रदेशको ११ वटा जिल्लाका ७१ वटा गाउँपालिकामा न्याय सम्पादनमा सहजीकरण गर्न सहजकर्ता नियुक्तिको प्रक्रिया अघि बढाएको हो ।
यसका लागी प्रदेशको आन्तरिक मामिला तथा कानून मन्त्रालयले गाउँपालिकाहरुमा न्यायिक सहजकर्ता नियुक्तिको लागि भन्दै मंगलबार सूचना प्रकाशन गरेको छ । प्रदेशको ११ वटा जिल्लाका ७१ वटा सहजकर्ता नियुक्तिको प्रक्रिया अगाडी बढाएको मन्त्रालयका सचिव धुर्व गैंडाले जानकारी दिए । सचिव गैंडाका अनुसार प्रदेशको ७४ मध्ये ७१ वटा गाउँपालिकामा न्यायिक सहजकर्ता नियुक्तिको लागि मंगलबार सूचना प्रकाशन गरेको हो । 
मन्त्रालयले न्यायिक सहजकर्ताहरुलाई करारमा नियुक्त गर्न लागेको सचिव गैंडाको जानकारी दिए । उनले संबन्धित गाउँपालिकाहरुको समन्वयमा प्रतिपालिका एक जना सहजकर्ता नियुक्त गर्नेगरी सूचना जारी गरिएको बताए । गाउँपालिकाहरुमा रिक्त रहेका सहायकस्तर पाँचौं तहमा न्यायिक सहजकर्ताको पद पूर्तिका लागि २०८१ असार समान्तसम्मका लागि करारमा पदपूर्ति गर्न मन्त्रालयले सूचना निकालेको उनको भनाई छ । 
स्थानीय न्यायिक सहजकर्ता (नियुक्ति तथा परिचालन) कार्यविधि, २०८० बमोजिम मन्त्रालयले ललितपुर, मकवानपुर, चितवन, धादिङ, नुवाकोट, रामेछाप, दोलखा, रसुवा, काभ्रे, सिन्धुपाल्चोक र सिन्धुलीका ७१ गाउँपालिकामा न्ययिक सहजकर्ता नियुक्त गर्न सूचना जारी गरेको हो । तर प्रदेशका ३ वटा गाउँपालिकाहरुले भने प्रदेश सरकार मार्फत न्ययिक सहजकर्ता नियुक्त नगर्ने जनाएका छन् । 
सचिव गैंडाका अनुसार सिन्धुलीको गोलन्जोर गाउँपालिका, रामेछापको उमाकुण्ड गाउँपालिका र सिन्धुपाल्चोकको इन्द्रवती गाउँपालिकाले भने न्यायिक सहजकर्ता माग गरेका छैनन् । उनले ति गाउँपालिकाहरुले आफ्नै स्रोतबाट न्यायिक सहजकर्ता नियुक्त गर्नेगरी प्रदेश सरकार मार्फत माग नगरेको बताए । 
सचिव गैडाका अनुसार उक्त पदका लागि प्रविणता प्रमाणपत्र तह उत्तिर्ण गरेकाहरुले आवेदन दिन सक्नेछन् भने स्थानीय र कानुन अध्ययन गरेकाहरुलाई प्राथमिकतामा दिइने छ । उक्त पदका लागि सूचना प्रकाशित भएको मितिले १५ दिनभित्र मन्त्रालयमा आवेदन दिनसक्ने बताइएको छ ।