हेटौँडामा ९५ हजार नक्कली नेपाली नोट सहित तीनजना पक्राउ 

१५ भदौ, हेटौंडा । हेटौँडामा नक्कली नेपाली रुपैया सहित तीनजना पक्राउ परेका छन् । मकवानपुर प्रहरीले बिहीबार राति बारा र मकवानपुरको सिमाना हेटौंडा–१५ चुरियामाई मन्दिरबाट ९५ हजार नक्कली नेपाली रुपैया सहित तीनजना मानिसलाई पक्राउ गरेको हो । 
९५ हजार नक्कली नेपाली रुपैया सहित प्रहरीले रौतहट को कटहरीया नगरपालिका वडा नम्बर ६ का १९ बर्षका धर्मेन्द्र महरा,कटहरीया नगरपालिका वडा नम्बर १ का २१ बर्षका दिपेश दास र मकवानपुरको राक्सिराङ गाउँपालिका वडा नम्बर २ को ४० बर्षका बिजय तामाङलाई पक्राउ गरेको हो ।
विशेष सूचनाको आधारमा प्रहरीले महरा र दासलाई हेटौंडा १५ स्थित चुरीयामाई मन्दिर नजिकै हिडिरहेको अवस्थामा उक्त नक्कली नोट सहित पक्राउ गरेको मकवानपुर प्रहरी प्रवक्ता एवं टेकबहादुर कार्कीले जानकारी दिएका छन् ।उनीहरुलाई ईलाका प्रहरी कार्यलय पशुपतिनगरमा ल्याई सोधपुछ गर्ने क्रममा मकवानपुरको राक्सिराङका बिजय तामाङले उक्त नक्कली रुपैयाँ दिएको सूचना दिएपछी प्रहरीले तामाङलाई पनि नियन्त्रणमा लिएको प्रवक्ता कार्कीले बताए । प्रहरी नियन्त्रणमा रहेका महरा, दास र तामाङलाई जिल्ला प्रहरी कार्यलयमा राखिएको र उनीहरुमाथि आवश्यक अनुसन्धान प्रक्रिया अगाडि बढाइएको प्रहरीले जनाएको छ ।