बागमतीमा संसदीय समितिको बैठक बस्न सुरु

२० भदौ, हेटौंडा । प्रदेशसभा गठन भएको ९ महिना पछि मंगलबार बागमती प्रदेश सभामा संसदीय समितिको बैठक बसेको हो । बागमती प्रदेश सभाको दोस्रो कार्यकालको पहिलो बैठक १८ पौष २०७९ मा बसेको थियो । 
प्रदेश सभामा रहेका पाँचवटा संसदीय समितिहरुको बैठक पहिलोपटक मंगलबार बसेको छ । प्रदेश सभा सचिवालका अनुसार समितिका जेष्ठ सदस्यहरुको अध्यक्षतामा बैठक बसेको हो । 
मंगलबार प्रदेश सभामा रहेका पाँचवटा संसदीय समितिहरु प्रदेश मामिला समिति, सार्वजनिक लेखा समिति, अर्थ तथा विकास समिति, शिक्षा, स्वास्थ्य तथा कृषि समिति र उद्योग, पर्यटन तथा वातावरण समितिको बैठक बसेको सचिवलायका प्रवक्ता मनोज गुप्ताले जानकारी दिए । 
प्रवक्ता गुप्ताका अनुसार प्रदेश मामिला समितिको सभापतित्व कांग्रेसका शिवराज अधिकारी, अर्थ तथा विकास समितिको सभापतित्व माओवादीका रामप्रसाद ढुंगाना र सार्वजनिक लेखा समितिको सभापतित्व मााओवादी केन्द्रकै ठाकुर प्रसाद ढकालले गरेका थिए ।
यस्तै प्रदेश सभाको शिक्षा स्वास्थ्य तथा कृषि समितिको सभापतित्व कांग्रेसकी मिना कुमारी पराजुली पोखरेल र उद्योग पर्यटन तथा वातावरण समितिको सभापतित्व कांग्रेसकै याङकिला शेर्पाले गरेकी थिइन् ।
सत्तारुढ दलहरु बिच समितिको सभापतिको बिषयमा भागबण्डा मिल्न नसक्दा अहिलेसम्म समितिहरुले सभापति पाउँन सकेका छैनन् । तर असारमा संसदीय समिति गठन तथा सदस्यहरुको भने टुंगो लागेको थियो । 
मंगलबार बसेका समितिहरुको बैठकले सम्बन्धीत समितिको बैठक तथा काम कारबाही संचालनको लागि कार्यविधी निर्माण गर्ने निर्णय गरेका छन् । यस्तै समितिलाई आवस्य कार्यविधी निर्माणका लागि उपसमिति समेत गठन गरिएको छ । ५ सदस्यीय उपसमितिले निर्माण गरेको कार्यविधिलाइ संसदीय समितिको अर्को बैठकमा पेश गरेर पारित गरिने प्रवक्ता गुप्ताले बताए ।