समाजवादी मोर्चाको सन्देश सभा सम्पन्न

२४ भदौ, हेटौंडा । माओबादी केन्द्रका अध्यक्ष एवं प्रधानमन्त्री पुष्पकमल दाहाल प्रचण्डले आफु राम्रो काम गरेर देखाउन प्रधानमन्त्री भएको बताएका छन् । 
उनले प्रधानमन्त्रीका रूपमा आफ्नो तेस्रो कार्यकाललाई अवसरका रुपमा लिएको उल्लेख गर्दै जति समयसम्म प्रधानमन्त्री भइन्छ त्यतीन्जेलसम्म राम्रो काम गर्ने बताए ।
आइतबार हेटौँडामा चार दल सम्मिलित समाजवादी मोर्चाको सन्देश सभालाई सम्बोधन गर्दै प्रधानमन्त्री प्रचण्डले सरकारले देशमा व्याप्त रहेको भ्रष्टाचार, बेथिती र कुशासनका विरुद्ध संचालन गरेको अभियान नरोकिने बताए ।
 केहि व्यक्तिलाई आफ्नो सरकारले चालेको सुशासनको अभियान मन नपरेको उनले दावी पनि गरे । कुशासनबाट फाइँदा लिइरहेकाहरू सुरुदेखि नै अभियानबाट आत्तिएको प्रधानमन्त्री प्रचण्डको भनाई छ ।
उनले जनयुद्ध र जनआन्दोलनबाट प्राप्त उपलब्धिको रक्षा गर्न कै लागी आफुहरुले समाजवादी मोर्चा बनाएको पनि बताए । उनले मोर्चाको कार्यक्रम अहिले कोठामा गरेको देखिएपनि आवस्यकता परे प्राप्त उपलब्धिको रक्षाको लागी लाखौ जनतालाई सडकमा उतार्न तयार रहेको चेतावनी पनि दिए ।

मोर्चामा आवद्ध हुन कम्युनिष्ट पार्टीहरुलाई माधव नेपालको आव्हान
एकीकृत समाजवादी नेपालका अध्यक्ष माधव कुमार नेपालले विभाजीत रहेका कम्युनिष्ट पार्टीहरुलाई मोर्चामा आवद्ध हुन आग्रह गरेका छन् । नेता नेपालले विचार र व्यवहार मिल्ने कम्युनिष्ट पार्टीहरुलाई मोर्चामा आवद्ध हुन आग्रह गरेका हुन् । 
उनले मोर्चाले परिवर्तनको पक्षमा काम गर्ने दावी गर्दै प्रधानमन्त्री पुष्पकमल दाहाल प्रचण्ड नेतृत्वको सरकार त्यसको उदाहरण रहेको दावी गरे । नेता नेपालले जनयुद्धको नेतृत्व गरेर आएका पुष्पकमल दाहल प्रचण्डको नेतृत्वमा रहेको मोर्चामा गोलबद्ध भएर जनताको परिवर्तनको चाहाना पुरा गर्न कम्युनिष्टहरु एक हुनपर्नेमा जोड दिए ।
नेता नेपालले अहिले सरकारको नेतृत्व जनताको एउटा सफल योद्धाले गरेको उल्लेख गर्दै भ्रष्टाचार र कुशासन विरुद्ध अभियान थालेका प्रचण्डल राम्रो काम गरिरेहको दावी गरे । 
यस्तै उक्त अवसरमा नेपाल कम्युनिष्ट पार्टी (नेकपा) का महासचिव नेत्रविक्रम चन्द ‘विप्लव’ले सरकारको राम्रो काममा सडकबाट साथ दिन तयार रहेको बताए । भ्रष्टाचार लगायत विभिन्न काण्डमा सरकारले राम्रो काम गरिरहेकोमा प्रशंसा गर्दै उनले सरकालाई साथ र सहयोग रहेको उनको भनाई थियो ।
नेता विप्लबले भ्रष्टाचार र बेतिथि विरुद्ध अझै दरो ढंगले खुट्टा टेक्न प्रधानमन्त्री प्रचण्डलाई आग्रह समेत गरे । संविधानको रक्षा र जनजिविकाको क्षेत्रमा काम गर्न मोर्चामा आबद्ध भएको नेता विप्लबको भनाई थियो ।