बागमती प्रदेशसभाबाट चार विधेयक विषयगत समितिमा पठाइयो

३० भदौ, हेटौंडा । बागमती प्रदेशसभाबाट चार वटा विधेयक विषयगत समितिमा पठाएको छ । शनिबार बसेको प्रदेशसभा बैठकले चारवटा विधेयक दफावार छलफलका लागि समितिमा पठाएको हो ।
बैठकमा सामाजिक विकास मन्त्री कुमारी मोक्तानले पेश गरेको ‘विज्ञान, प्रविधि, नवप्रवर्तन तथा विकास कोष सञ्चालन सम्बन्धमा व्यवस्था गर्न बनेको विधेयक’, स्वास्थ्य मन्त्री उत्तम जोशीले पेश गरेको ‘प्रदेश स्वास्थ्य सेवा ऐन, २०७५ लाई संशोधन गर्न बनेको विधेयक, २०८०’ र कृषि तथा पशुपन्छी विकास मन्त्री डा. राजेन्द्रमान श्रेष्ठले पेश गरेको ‘प्रदेश कृषि विकास सम्बन्धमा व्यवस्था गर्न बनेको विधेयक’ दफावार छलफलका लागि शिक्षा, स्वास्थ्य तथा कृषि समितिमा पठाइएको छ ।
त्यस्तै आन्तरिक मामिला तथा कानुन मन्त्री गंगा नारायण श्रेष्ठका तर्फबाट मन्त्री मोक्तानले पेश गरेको ‘प्रदेश सञ्चार माध्यम व्यवस्थापन ऐन, २०७५ लाई संशोधन गर्न बनेको विधेयक प्रदेश मामिला समितिमा पठाइएको छ ।
बैठकले संविधान सभा अध्यक्ष, प्रतिनिधिसभाका पूर्व सभामुख, पूर्व मन्त्री तथा प्रतिनिधिसभा सदस्य सुवासचन्द्र नेम्वाङको असामयिक निधन भएकोमा शोक प्रस्ताव समेत पारित गरेको छ । प्रदेशसभाको अर्को बैठक असोज १४ गते बिहान ११ः३० बजे बस्ने भएको छ ।