देशभर आकस्मिक बाहेकका सम्पूर्ण स्वास्थ्य सेवाहरू बन्द

३१ भदौ, हेटौंडा । भदौ २७ गते हेटौँडास्थित सन्चो अस्पतालका डाक्टर विकास थापा तथा प्रशान्त विडारीमाथि भएको आक्रमणका दोषीलाई सरकारले कानुनी दायरामा ल्याउन चासो नदेखाएको भन्दै नेपाल चिकित्सक संघले आन्दोलनको घोषणा गरेको छ । संघले शनिबार एक विज्ञप्ति जारी गरी ७ बुँदे चरणबद्ध आन्दोलनको घोषणा गरेको हो ।
नेपाल चिकित्सक संघका अध्यक्ष अनिल विक्रम कार्की तथा महासचिव संजिव तिवारीद्वारा संयुक्त रुपमा जारी विज्ञप्तीमा घटनाभए लगत्तै संघले दिएको ७२ घण्टे अल्टिमेटम सिकिए पनि सरकार तथा प्रशासनले दोषीलाई दायरामा ल्याउन चासो नदेखाएको भन्दै ७ बुँदे चरण बद्ध आन्दोलनको घोषणा गरिएको उल्लेख गरिएको छ । आन्दोलनका कार्यक्रममा भदौ ३१ गते आइतबार देशभरका सम्पूर्ण सरकारी स्वास्थ्य संस्था, अस्पताल, मेडिकल  कलेज, निजी अस्पाल तथा क्लिनिकहरूमा आकस्मिक सेवा बाहेकका सम्पूर्ण स्वास्थ्य सेवाहरू पूर्ण रूपमा बन्द गर्ने संघले जनाएको छ ।  
संघले घटनामा संलग्न सम्पूर्ण दोषीहरूको अविलम्ब छानबिन गरी फौजदारी अभियोग तथा स्वास्थ्यकर्मी तथा स्वास्थ्य संस्थाको सुरक्षासम्बन्धी पहिलो संशोधन ऐन २०७९ बमोजिम कानुनी कारबाहीको सुनिश्चितता हुनुपर्नेमा समेत जोड दिएको विज्ञप्तीमा उल्लेख गरिएको छ । संघले हेटौँडा अस्पताल घटनाका दोषीहरूलाई पक्राउ गरी कानुनी कारबाही चलाउनुको सट्टा स्थानीय सुरक्षा निकाय, जिल्ला प्रशासन कार्यालय, जिल्ला प्रहरी कार्यालयका जिम्मेवार व्यक्तिहरूले मेलमिलाप गराउने भनी घटनालाई निस्तेज पार्न खोजिएको आरोप लगाउँदै सम्बन्धित निकाय माथि आवश्यक छानबिन गरी कानुन बमोजिम कारबाही गर्न समेत माग गरेको छ । 
यता प्रहरीले घटनामा संलग्न मृतककी श्रीमती, छोरी, छोरा र भतिजलाई पक्राउ गरेर अनुसन्धानका लागि जिल्ला अदालत मकवानपुबाट तीन दिनको म्याद पाएको छ । पक्राउ परेका ४ जना जिल्ला प्रहरी कार्यालयको हिरासतमा रहेका छन् ।