देशको निर्माणका लागी संविधानको पालना आवस्यकः प्रमुख शर्मा

३ असोज, हेटौंडा । बागमती प्रदेशका प्रदेश प्रमुख यादवचन्द्र शर्माले संविधान दिवसलाई संविधानको पालना, रक्षा र कार्यान्वयनमा अटल एवं अविचल रहने दिनको रूपमा अङ्गीकार गर्नुपर्ने बताएका छन् । 
बागमती प्रदेश सरकारले बुधबार हेटौँडामा आयोजना गरेको संविधान दिवस २०८० को बिशेष समारोहलाई सम्बोधन गर्दै उनले संविधानलाई अक्षरसः पालना गर्नसके लोकतान्त्रिक आन्दोलनप्रति सम्मान र वीर शहीदहरुप्रति श्रद्घाञ्जली हुने बताए । 
प्रदेश प्रमुख शर्माले नेपालको संविधानले समाजवादको सुखद् परिकल्पना गरेको र यसबाटै समृद्ध नेपाल निर्माण गर्दै नेपालीको मुहार हसिलो पार्न सकिने दावी पनि गरे । ‘यसै संविधानले जनताको न्याय, समानता र जनजीविकाको हक स्थापित गरेको हो । यसमा सबैको ध्यान पुग्ुनुपर्छ । यही संविधानले केन्द्रीकृत एकात्मक राज्य व्यवस्थाले सिर्जना गरेका सबै प्रकारका विभेद र उत्पीडनको अन्त्य गरेको हो यसलाई पनि हामीले बिर्सनु हुँदैन,’ उनले भने । 
प्रदेश प्रमुख शर्माले संघीयता, गणतन्त्र तथा धर्मनिरपेक्षता यी सबै कुरा यहि संविधानको उपलब्धि भएकोले यसको रक्षाको लागी सबै नेपाली एकजुट भएर लाग्नुपर्नेमा जोड दिए ।
कार्यक्रममा बोल्दै प्रदेशका मुख्यमन्त्री शालिकराम जम्कट्टेलले संविधानको सफल कार्यान्वयन ले देश निर्माणमा टेवा पुग्ने बताए । उनले देशलाई दिशा दिने बिषयमा संविधानको भूमिका मुख्य हुने भएकाले संविधानको सफल कार्यान्वयनका लागी सबैले अपनत्व लिनुपर्ने बताए । 
यसअघि बुधबार बिहान बागमती प्रदेश सरकारले संविधान दिवस २०८० को अवसरमा प्रभातफेरी कार्यक्रमको आयोजना गरेको थियो । प्रदेशका मुख्यमन्त्री शालिकराम जम्कट्टेलसहितको उपस्थितमा भएको प्रभातफेरी हेटौँडाको बुद्ध चोकबाट पिपल बोट, चौकिटोल ओरालो, मानसचोक हुँदै मुख्यमन्त्री तथा मन्त्रीपरिषद् कार्यालय पुगेर औपचारिक कार्यक्रममा परिणत भएको थियो । 
कार्यक्रममा प्रदेशका मन्त्री तथा सचिव, कर्मचारी विभिन्न संघ संस्थाका प्रतिनिधि लगाएतको उपस्थिति रहेको थियो । यस्तै प्रभातफेरीमा सुरक्षा निकायले व्याण्डबाज गर्नुका सागै विभिन्न जातिय तथा सामाजिक संघसंस्थाहरुले संस्कृतिका झाँकी प्रस्तुत गरेका थिए ।