प्राज्ञ गुरुङ र चालिसे मातृभूमि सम्मानबाट सम्मानित

६ असोज, हेटौँडा । वरिष्ठ संस्कृतिविद् एवं प्रज्ञा प्रतिष्ठानका पूर्व उपकुलपति प्राध्यापक डा. जगमान गुरुङ ‘मातृभूमि राष्ट्रिय सम्मान २०८०’ बाट शनिवार हेटौँडामा सम्मानित भएका छन् ।
मकवानपुरको अग्रणी साहित्यीक संस्था मातृभूमि साहित्य समाज मकवानपुरले संस्थाको २५औं स्थापना दिवसको अवसर पारेर शनिवार गुरुङलाई सम्मानित गरेको हो । उनलाई नगद २५ हजार एक राशिसहित उक्त सम्मान प्रदान गरिएको छ ।
संस्थाले प्रत्येक दुई वर्षमा प्रदान गर्दै आएको उक्त सम्मान यसवर्ष प्राज्ञ गुरुङलाई प्रदान गरिएको समाजका अध्यक्ष माधव पोखरेलले जनाकारी दिए । नेपाली संस्कृति क्षेत्रमा महत्वपूर्ण योगदान पु¥याए बापत प्राज्ञ डा. गुरुङलाई उक्त पुरस्कार प्रदान गरिएको अध्यक्ष पोखरेलले बताए । 
नेपाल प्रज्ञा प्रतिष्ठानका पूर्व उपकुलपति समेत रहेका प्राज्ञ डा. गुरुङ नेपाली इतिहास एवं संस्कृति क्षेत्रका गहन अध्येता पनि हुन् । विभिन्न प्रतिष्ठान तथा विश्वविद्यालयको महत्वपूर्ण जिम्मेवारी सम्हालेका गुरुङको शोधपत्र लेखन एवं अनुसन्धान कार्यमा गहन भूमिका रहेको छ ।
यस्तै मतृभूमि समाजले नगद ११ हजार १११ राशिको ‘मातृभूमि लघुकथा रत्न सम्मान–२०७९’ बाट ‘लघुकथालय’का सर्जक वरिष्ठ लघुकथाकार डा.विदुर चालिसेलाई सम्मान गरेको छ । लामो समयदेखि लघुकथाको क्षेत्रमा कलम चलाउँदै आएका डा.चालिसेका नेपाली भाषामा विभिन्न लघुकथा संग्रह, कविता, भाषा, अनुसन्धान र समालोचनाका पुस्तकहरू प्रकाशित रहेका छन् ।
सोही कार्यक्रमको अवसर पारेर मकवानपुरकी महाकाव्यकार मुना अर्यालको दोस्रो महाकाव्य ‘महाकाश’ को विमोचन समेत गरिएको छ । मतृभूमि साहित्य समाजका अध्यक्ष पोखरेको अध्यक्षतामा भएको कार्यक्रमका प्रमुख अतिथि बागमती प्रदेशका सामाजिक विकास मन्त्री कुमारी मोक्तानले प्राज्ञ डा. गुरुङ र डा. चालिसेलाई सम्मानीत गरेकी हुन् ।
यस्तै मन्त्री मोक्तान, सम्मानित व्यक्तित्वहरु डा. गुरुङ, डा. चालिसे, सर्जक संजाल मकवानपुरका संयोजक निमेष निखिल, मुक्तीगोविन्द बैध, माहाकाव्यकार मुना अर्याल लगाएतले संयुक्त रुपमा माहाकाव्य ‘महाकाश’को विमोचन गरेका हुन् ।