भन्सार छली ल्याएको मदिरा सहित पाँचजना भारतीय प्रहरी नियन्त्रणमा

७ असोज, हेटौंडा ।  मकवानपुर प्रहरीले आइतबार भन्सार छलि ल्याइएको विभिन्न ब्राण्डका ८५५ बोतल मदिरा, ओसार पसारमा प्रयोग भएको दुईवटा भारतीय कार र पाँचजना भारतीय नागरिकलाई सार्वजनिक गरेको छ ।
प्रहरीले असोज ५ गते शनिवार र ६ गते आइतबार बरामद गरेको मदिरा सहित कार र संलग्न व्यक्तिहरुलाई सार्वजनिक गरेको हो ।
पक्राउ पर्नेहरुमा भारतको पश्चिम दिल्ली बस्ने २७ बर्षको बिक्की, २५ बर्षको राहुल, २८ बर्षको कुनाल, ३१ को नहिम र ३७ बर्षको राजु रहेको जिल्ला प्रहरी कार्यलय मकवानपुरका प्रहरी प्रमुख सितारमा रिजालले जानकारी दिए ।
उनका अनुसार प्रहरी चौकी रातोमाटेबाट खटिएको प्रहरी टोलीले हेटौँडा १५ रातोमाटे चेकपोष्ट अगाडीबाट उक्त मदिरा र कारसहित पाँचजना भारतीयलाई नियन्त्रणमा लिएको हो ।
बिशेष सूचनाको आधारमा सवारी साधनहरु रोकी जाँच गर्ने क्रममा चितवनबाट आउदै गरेको  डिएल २ सिएके १३९० र डिएल २ सिएके ७२७३ नम्बरको भारतीय कारबाट भारतको उत्तर प्रदेशबाट भन्सार छलि ल्याईएको रोयल ग्रिन व्हिस्की ३७५ एमएलको ७१५ बोतल र १८० एमएलको १४० बोतल गरि जम्मा ८५५ बोतल मदिरा बरामद गरेको प्रहरी प्रमुख रिजालले जानकारी दिए ।
उक्त मदिरा भारतको बिहार तर्फ लैजाने क्रममा हेटौँडामा नियन्त्रणमा लिएको उनलेे बताए । भरतको बिहारमा मदिरा प्रयोगमा प्रतिबन्ध रहेकोेले उनीहरुले नेपालको बाटो हुँदै तस्करी गरेको हुनसक्ने प्रहरी प्रमुख रिजालको भनाई छ । 
नियन्त्रणमा लिएको मदिरा सहित कार र पक्राउ परेका व्यक्तीहरुलाई आवश्यक अनुसन्धान तथा कारबाहीको लागि राजश्व अनुसन्धान कार्यालय पथलैया, बारा पठाइएको प्रहरी प्रमुख रिजालले जानकारी दिए ।