मकवानपुरमा मुद्दा र पक्राउ पर्ने बढे

१२ असोज, हेटौंडा । मकवानपुरमा विभिन्न प्रकृतिका घटना, मुद्दा र त्यसमा संलग्नहरु पक्राउ पर्नेको संख्या बढ्दो क्रममा रहेको पाइएको छ । पछिल्लो तीन वर्षको तथ्यांकलाई हेर्दा प्रत्येक वर्ष मुद्दा र पक्राउ पर्नेको संख्या बढ्दो क्रममा रहेको पाइएको हो । 
आर्थिक वर्ष २०७७÷७८ मा जिल्ला प्रहरी कार्यालय मकवानपुरमा ७३२ वटा मुद्दा दर्ता हुँदा ५८७ जना नेपाली र ७ जना विदेशी गरी ५९४ जना पक्राउ परेका थिए । आर्थिक वर्ष २०७८÷७९ मा यो तथ्यांकमा बृद्धि भएको पाइएको छ । 
यस वर्ष ८०२ वटा मुद्दा दर्ता हुँदा उक्त घटनाहरुमा संलग्न रहेको आरोपमा ७०१ जना नेपाली र २९ जना विदेशी गरी ७३० जना पक्राउ परेका छन् । 
यस्तै अघिल्लो अर्थिक वर्ष २०७९÷८० मा ८६६ वटा मुद्दा दर्ता भएको पाइएको छ । जसमा ७२९ जना नेपाली र ३५ जना विदेशी गरी ७६४ जना पक्राउ परेका छन् । चालु आर्थिक वर्षको भदौ महिना सम्ममा १८८ वटा मुद्दा दर्ता भैसकेको छ । जसमा १४८ जना नेपाली र १० जना विदेशी गरी १५८ जना पक्राउ परिसकेको जिल्ला प्रहरी कार्यालय मकवानपुरको तथ्यांकले देखाएको छ । 
जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक लक्ष्मी भण्डारीले पछिल्लो समय विभिन्न अपराधिक घटनाहरु बढेकोले मुद्दा र पक्राउ पर्नेको संख्यामा पनि बृद्धि भएको बताए । यो स्वभाविक भएको उनको भनाई रहेको छ ।