४ किलो सुनसहित पक्राउ गरिएकाहरूमाथि संगठित अपराधमा अनुसन्धान

१२ असोज, दोलखा । दोलखाको सिंगटीबाट ४ किलो सुन सहित पक्राउ गरिएकाहरूमाथि प्रहरीले संगठित सुन तस्करीको मुद्धामा अनुसन्धान थालेको छ । 
बुधवार ४ किलो सुन सहित ५ जनालाई जिल्ला प्रहरी कार्यालय दोलखा र इलाका प्रहरी कार्यालय सिंगटीको टोलीले पक्राउ गरेकाहरूलाई भन्सार ऐन २०६४ तथा संगठित अपराध निवारण ऐन–२०७० विरुद्धको कसुरमा अनुसन्धान थालिएको दोलखाका डिएसपी दीपक खड्काले जानकारी दिए ।
प्रहरीले बिगु गाउँपालिका–१ बस्ने २८ वर्षीय केशर तामाङ, २० वर्षीय माधव मगर, १९ वर्षीय पेम्बा तामाङ, ५५ वर्षीय नुर्वु छिरिङ शेर्पा र ३० वर्षीया सुनमाला तामाङलाई पक्राउ गरेको छ ।
बिगु गाउँपालिका–३ जामुनेमा डेरा गरेर बस्ने केशर लगायतले अवैध रुपमा सुन ल्याएको सुचनाको आधारमा प्रहरीले केशरको डरामा खानतलासी गर्दा सुन भेटिएको थियो । केशर, पेम्बा र माधवको बयानका आधारमा नुर्वु छिरिङ र सुनमाला बिहीबार भीमेश्वर नगरपालिका-६ स्थित शुभकामना होटलबाट पक्राउ परेका थिए ।

अपडेट: बिगु गाउँपालिका–३ स्थित सिंगटीबाट थप ३ केजी सुन बरामद गरिएको छ । चार किलो सुन सहित पक्राउ गरिएका केशर तामाङको डेरा सर्च गर्दा थप ३ केजी सुन भेटिएको डिएसपी खड्काले जानकारी दिए ।