प्रधानमन्त्री प्रचण्ड आज स्वदेश फर्किदै 

file photo

१३ असोज, हेटौंडा । प्रधानमन्त्री पुष्पकमल दाहाल ‘प्रचण्ड’ अमेरिका र चीनको औपचारिक भ्रमण सकेर आज (शनिबार) स्वदेश फर्कदै छन् । अमेरिकापछि चिनको भ्रमणमा रहेका प्रधानमन्त्री प्रचण्ड आठ दिनको भ्रमण सकेर नेपाल फर्किन लागेका हुन् ।
संयुक्त राष्ट्रसंघको ७८ औँ महासभामा भाग लिन प्रधानमन्त्री ‘प्रचण्ड’ नेपाली प्रतिनिधिमण्डलको नेतृत्व गर्दै भदौ ३० गते अमेरिका प्रस्थान गरेका थिए । महासभामा जलवायु सम्मेलनलगायत विविध सत्रमा प्रधानमन्त्री प्रचण्डले नेपाल सरकारका तर्फबाट सम्बोधन गरेका थिए ।
त्यस अवसरमा न्युयोर्कमा रहँदा उनले अमेरिकाका राष्ट्रपति जो बाइडेनसँग विशेष भेटवार्ता गर्नुका साथै अन्य मुलुकका समकक्षीहरुसँग पनि द्विपक्षीय भेटवार्ता गरेका थिए ।
अमेरिकाबाट सिधै छिमेकी मुलुक चीनको औपचारिक भ्रमणका लागि असोज ५ गते त्यसतर्फ प्रस्थान गरेका प्रधानमन्त्री प्रद्धण्डले चीनका राष्ट्रपति सी चिनफिङसँग उच्चस्तरीय द्विपक्षीय भेटवार्ता गर्नुकासाथै चीनमा भएको एसियाली खेलकुदलगायत विविध समारोहमा सहभागिता जनाएका थिए ।
प्रधानमन्त्री प्रचण्डको चीन भ्रमणका क्रममा दुई देशबिच १३ वटा समझदारीपत्रमा हस्ताक्षर भएको छ । उनी आज शनिबार बिहान १० बजे नेपाल आइपुग्ने कार्यक्रम रहेको छ ।