सरकारी निकायमा अपांगमैत्री संरचनाको माग

१५ असोज, हेटौंडा । बागमती प्रदेशका सरकारी निकायमा अझैपनि अपांगमैत्री तथा पहुँचयुक्त शौचालय र धारा नभएको भन्दै सरोकारवालाहरुले गुनासो गरेका छन् । 
राष्ट्रिय अपांग महासंघ बागमती प्रदेशले आइतबार हेटौंडामा आयोजना गरेको अपांगता अधिकार सवाल र पहुँचयुक्त भौतिक संरचना प्रतिवेदन सार्वजनिक कार्यक्रममा सहभागी अगुवाहरुले यस्तो गुनासो गरेका हुन् ।
सरकारी निकायमा अपांगमैत्री चिन्ह र संकेत नभएको, ¥याम तथा लिफ्टको व्यवस्था नभएको, विपद् व्यवस्थापन योजना नभएको जानकारी दिइएको हो ।
प्रतिवेदन सार्वजनिक गर्दै महासंघका जनवकालत अधिकृत सुरेन्द्र तिमल्सिनाले अपांगता भएकाहरुको लागि सरकारी निकायमा बैठक हल पहुँचयुक्त नभएको, पार्किङमा समस्या हुने गरेको, पहुँचयुक्त वेभसाइट नभएको जानकारी दिए ।
अपांग महासंघ बागमती प्रदेशका अध्यक्ष अस्वीन लम्सालले मिडियामा आउने गरेको समाचारमा दयामुखी भाव झल्किने गरेको बताए । उच्च ओहोदामा भएकाहरुले नै अपांगलाई होच्याउने शब्दहरु प्रयोग गर्ने गरेको भन्दै उनले दुःख व्यक्त गरे । 
कार्यक्रममा आइएल सेन्टरका महासचिव गणेश केसीले अपांगता भएकाहरुको लागि प्रयोग गर्नुपर्ने शब्द र प्रयोग हुँदै आएको शब्दहरुको बिषयमा जानकारी दिएका थिए । 
नेपाल पत्रकार महासंघ मकवानपुरका अध्यक्ष मणिराज गौतमले समाचार लेख्दा शब्द चयनमा ध्यान दिन सञ्चारकर्मीहरुलाई अनुरोध गरे । कार्यक्रममा राष्ट्रिय मानव अधिकार आयोग तथा अपांग महासंघका प्रतिनिधिहरुको उपस्थिती थियो ।